ភ្នំពេញៈ លោក ហម ម៉េងសែ ប្រធានក្រុមប្រឹក្សាជំនុំជម្រះ សាលាដំបូងរាជធានីភ្នំពេញ នៅព្រឹកថ្ងៃទី២ ខែឧសភា ឆ្នាំ២០២៩នេះ បានសម្រេចពន្យាពេលការកាត់ទោសអតីតអភិបាលខេត្តតាកែវ លោក ឡាយ វណ្ណៈ ដោយមិនកំណត់ ដោយសារលោកចៅក្រមឈ្មោះ ស្វាយ តុញ ជាចៅក្រមប្រឹក្សាក្នុងរឿងក្ដីនេះ មានជំងឺមិនអាចចូលរួមសវនាការបាន។
បន្ទាប់ពីតុលាការប្រកាសលើកពេលសវនាការ ដោយសារអវត្តមានចៅក្រមប្រឹក្សាម្នាក់ អនុរ័ក្សពន្ធនាគារបានបញ្ជូនជនជាប់ចោទទាំង៤នាក់ ទៅកាន់ពន្ធនាគារវិញ រងចាំការកោះហៅរបស់តុលាការជាថ្មី។
តាមការគ្រោងទុក នៅព្រឹកថ្ងៃទី២ ខែឧសភា ឆ្នាំ២០១៩នេះ តុលាការនឹងបន្តសវនាការលើសំណុំរឿងអតីតអភិបាលខេត្តតាកែវ លោក ឡាយ វណ្ណៈ ព្រមទាំងបងប្រុស ឡាយ ណារិទ្ធ អតីតស្នងការរង នគរបាលខេត្តតាកែវ ដែលជាប់ចោទពីបទ "ឃាតកម្ម" និងបទ "លាក់តម្រុយ"។ សវនាការបន្តនេះ តុលាការនឹងផ្ដោតលើការបង្ហាញភស្តុតាងរបស់សមត្ថកិច្ចនាយកដ្ឋាននគរបាលព្រហ្មទណ្ឌ ដែលដាក់បន្ទុកលើលោក ឡាយ វណ្ណៈ ឲ្យជាប់ពិរុទ្ធ ព្រមទាំងសាក្សីមួយចំនួនទៀត។
កាលពីខែមេសា ឆ្នាំ២០១៩ តុលាការបានស្ដាប់ និងពិនិត្យនូវរបាយការណ៍ និងភស្តុតាងមួយចំនួន របស់សមត្ថកិច្ចខេត្តតាកែវ ដែលបញ្ជាក់ថា ជនរងគ្រោះបានធ្វើអត្តឃាត មិនមែនជាករណីឃាតកម្មដូចការចោទប្រកាន់ទេ។
សូមរំលឹកថា នៅក្នុងសំណុំរឿងនេះ តុលាការបានចោទប្រកាន់លើជនជាប់ចោទ ទី១.ឈ្មោះ ឡាយ វណ្ណៈ ភេទប្រុស អាយុ៤៥ឆ្នាំ និងទី២.ឈ្មោះ ឡាយ ណារិទ្ធ ភេទប្រុស អាយុ៤៦ឆ្នាំ (ជាបងប្រុស របស់លោក ឡាយ វណ្ណៈ) ពីបទ "ឃាតកម្ម" ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា១៩៩ នៃក្រមព្រហ្មទណ្ឌ។
ជនជាប់ចោទទី៣.ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ ជាតៃកុងឡានរបស់លោក ឡាយ វណ្ណៈ និងទី៤.ឈ្មោះ ជឹម វុធ (ហៅថូត) ភេទប្រុស អាយុ៤១ឆ្នាំ ជាអ្នកបម្រើនៅផ្ទះរបស់លោកស្រី ចែវ សុវឌ្ឍនា ពីបទ "លាក់បំបាំងតម្រុង" ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា៥៣២ នៃក្រមព្រហ្មទណ្ឌ។
លោកស្រី ចេវ សុវឌ្ឍនា ត្រូវគេប្រទះឃើញស្លាប់ដោយចងកនៅក្នុងបន្ទប់គេងរបស់នាង នៅក្នុងផ្ទះជួលដ៏ធំមួយ ដែលលោក ឡាយ វណ្ណៈ ជាអ្នកជួលឲ្យនៅក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨កន្លងទៅ។
ភ្លាមៗករណីនេះ ត្រូវសមត្ថកិច្ចខេត្តតាកែវសន្និដ្ឋានថា ជារឿងអត្តឃាត ព្រោះតែវិបត្តិស្នេហា ប៉ុន្ដែ ក្រោយពីបើកការស្រាវជ្រាវ សមត្ថកិច្ចជំនាញរបស់នាយកដ្ឋានព្រហ្មទណ្ឌក្រសួងមហាផ្ទៃ បានរកឃើញថា ករណីខាងលើ មិនមែនជារឿងអត្តឃាតឡើយ ពោលគឺជារឿងឃាតកម្មទៅវិញ ដោយមានអ្នកបញ្ជា និងរៀបចំទុកដើម្បីសម្លាប់ជនរងគ្រោះ។ ក្រោយពីបើកការស៊ើបអង្កេត សមត្ដកិច្ចជំនាញ បានឃាត់ខ្លួនក្រុមជនជាប់ចោទទាំង៤នាក់ខាងលើ បញ្ជូនមកតុលាការឃុំខ្លួនរហូតដល់ថ្ងៃកាត់ទោសនេះ។
នៅក្នុងសវនាការកន្លងមក លោក ឡាយ វណ្ណៈ ដែលជាអ្នកជាប់ពាក់ព័ន្ធដោយផ្ទាល់ ទៅក្នុងអន្លង់ស្នេហ៍ដ៏សែនផ្អែមល្ហែមមានជម្រៅកាត់ថ្លៃពុំបាន តែងតែបដិសេធថា ខ្លួនមិនល្ងង់ខ្លៅរហូតសម្លាប់ស្រីកំណាន់របស់ខ្លួននោះឡើយ៕
