ឧត្តរមានជ័យ ៖ ក្រោយពីទទួលបានការចុះផ្សាយពាក់ព័ន្ធនឹងភាពមិនប្រក្រតី ក្នុងការអនុវត្តតួនាទី ភារកិច្ចរបស់នាយប៉ុស្តិ៍ និង មន្ត្រីនគរបាលអន្តោប្រវេសន៍ នៅប៉ុស្តិ៍ច្រកទ្វារព្រំដែនអន្តរជាតិអូរស្មាច់ នៅថ្ងៃទី១០ ខែឧសភា ឆ្នាំ២០១៩ នាយឧត្ដមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សម្រេចដាក់ពិន័យលើ លោកឧត្ដមសេនីយ៍ត្រី ខូង ទីន អត្តលេខ០៥១៨២ ជានាយប៉ុស្តិ៍នគរបាលច្រកទ្វារព្រំដែនអន្តរជាតិអូរស្មាច់ ដោយរូបភាពព្រមានជាលើកទី១ ពាក់ព័ន្ធការយកលុយពីប្រជាពលរដ្ឋ ដោយបានចាត់ក្រុមការងារមួយក្រុមដែល ដឹកនាំដោយឧត្ដមសេនីយ៍ឯក ជា ធា អគ្គនាយករងអន្តោប្រវេសន៍ ដើម្បីចុះត្រួតពិនិត្យស្រាវជ្រាវ។
បន្ទាប់ពីបានចុះត្រួតពិនិត្យស្រាវជ្រាវរួចមក តាមរយៈការបំភ្លឺ និងការពិនិត្យឃើញថា ជុំវិញព័ត៌មានអំពីការទារប្រាក់ ពីប្រជាពលរដ្ឋ ដែលបានធ្វើដំណើរឆ្លងកាត់ គឺពិតជាមានការឲ្យលុយ ៥,០០០រៀល ឬ ១០,០០០រៀល ដល់នគរបាលនៅទីនោះពិតមែន ក៏ប៉ុន្តែមិនជាការទាមទារទេ គឺអាស្រ័យដោយប្រជាពលរដ្ឋមួយចំនួនច្រើនជារៀងរាល់ថ្ងៃ ប្រជាពលរដ្ឋមួយចំនួន លោកមិនចេះបំពេញសាលកប័ត្រ ទើបពេលខ្លះមន្ត្រីនគរបាលអន្តោប្រវេសន៍ជួយបំពេញជូនពួកគាត់ ដើម្បីឲ្យបានទាន់ពេលវេលា។ ទន្ទឹមនឹងនោះ ប្រជាពលរដ្ឋមួយចំនួនក៏មានសន្តានចិត្ត ជូនប្រាក់បន្តិចបន្តួច ខ្លះ ប្រាំពាន់រៀល ខ្លះទៀតមួយម៉ឺនរៀល ដល់មន្ត្រីនគរបាលអន្តោប្រវេសន៍ជួយបំពេញ។
ទោះជាយ៉ាងណា ក៏ក្រុមការងារបានរកឃើញភាពអសកម្មមួយចំនួន បណ្តាលមកពីការគ្រប់គ្រងរបស់លោកឧត្ដមសេនីយ៍ត្រី ខូង ទីន ជានាយប៉ុស្តិ៍ មានការធូររលុង មិនមានការយកចិត្តទុកដាក់ ដូចជា អវត្តមានច្រើន មិនសូវនៅជាប់លាប់ និងដឹកនាំបញ្ជាកម្លាំងជាប្រចាំ ដែលនៅគោលដៅឈរជើងរបស់ខ្លួន។ នៅពេលអវត្តមាន លោកនាយប៉ុស្តិ៍ បានប្រគល់សិទ្ធិដឹកនាំការងារ ឲ្យលោកវរសេនីយ៍ឯក ជា ព្រឿង នាយរងប៉ុស្តិ៍ ជានាយប៉ុស្តិ៍ស្ដីទី ដើម្បីដឹកនាំបញ្ជា និងដោះស្រាយបញ្ហាការងារនៅក្នុងអង្គភាព។ ពេលខ្លះលោកឧត្ដមសេនីយ៍ត្រី ខូង ទីន នៅកន្លែង ក៏ប្រគល់ការងារឲ្យសិទ្ធិឲ្យលោកវរសេនីយ៍ឯក ជា ព្រឿង ជានាយប៉ុស្តិ៍ស្ដីទីដែរ។
ក្នុងគោលបំណងកែលម្អបញ្ហានេះ អគ្គនាយកដ្ឋានអន្តោប្រវេសន៍ នឹងចាត់វិធានការមួយចំនួន ក្នុងការទប់ស្កាត់ភាពអសកម្ម របស់មន្ត្រីនគរបាលអន្តោប្រវេសន៍ ដើម្បីរៀបចំសណ្ដាប់ធ្នាប់ ក្នុងធ្វើដំណើរចេញ-ចូល ឲ្យមានភាពងាយស្រួល ជូនប្រជាពលរដ្ឋរួមមាន ៖
១.សូមគោរពសុំគោលការណ៍ ដាក់ពិន័យលោកឧត្ដមសេនីយ៍ត្រី ខូង ទីន អត្តលេខ ០៥១៨២ ជានាយប៉ុស្តិ៍នគរបាលច្រកទ្វារព្រំដែនអន្តរជាតិអូរស្មាច់ ដោយរូបភាព ព្រមានជាលើកទី១, ២.រៀបចំកែលំអបញ្ជរបែបបទចេញ-ចូល ឲ្យបានសមស្រប និងរៀបចំលំហូរអ្នកដំណើរ ឲ្យមានការតម្រង់ជួរត្រឹមត្រូវ កុំឲ្យមានការឆ្លៀតឱកាសជួយសម្រួល លឿន រហ័សទាន់ពេល ដើម្បីរកផលប្រយោជន៍ផ្ទាល់ខ្លួន, ៣.ពង្រឹងការគោរពបទបញ្ជា វិន័យរបស់កងកម្លាំងនគរបាលជាតិ អប់រំសីលធម៌ ឥរិយាបថ និង អាកប្បកិរិយា បំពេញការងាររបស់មន្ត្រី តាមជំនាញវិជ្ជាជីវៈរបស់ខ្លួន និងធ្វើការដាក់វិន័យយ៉ាងតឹងរ៉ឹងបំផុត ចំពោះមន្ត្រីណាដែលប្រព្រឹត្តខុសឆ្គង និង៤.សូមការអនុញ្ញាតធ្វើការឆ្លើយតប ទៅអង្គភាពប្រឆាំងអំពើពុករលួយ (អ.ប.ព) អំពីការចាត់វិធានការ ដូចបានគោរពខាងលើ៕
