ភ្នំពេញៈ ខណៈមេឃកំពុងមានភ្លៀងធ្លាក់ខ្លាំង លាយលំជាមួយខ្យល់កន្ត្រាក់ បោកបក់ប៉ើងដំបូលស័ង្កសី ការដ្ឋានសំណង់មួយកន្លែង ធ្លាក់លើទីធ្លាក្បែរនោះ បណ្ដាលឲ្យសង្កត់លើមនុស្ស របួសធ្ងន់ស្រាល៣នាក់ ហើយរថយន្តជាច្រើនគ្រឿង កំពុងជាប់ក្រោមដ៏បូលដ៏ធំនេះ បង្កឲ្យមានការភ្ញាក់ផ្អើល ដល់បងប្អូនប្រជាពលរដ្ឋ និងក្រុមកម្មករ រាយការណ៍ប្រាប់សមត្ថកិច្ចមូលដ្ឋាន ចុះទៅកន្លែងកើតហេតុ និងទាក់ទង រថយន្តសង្គ្រោះបន្ទាន់ មកដឹកយកទៅសង្គ្រោះផងដែរ ។
គ្រោះធម្មជាតិ ខ្យល់កន្ត្រាក់ ប៉ើងដំបូលស័ង្កសីខាងលើនេះ កើតឡើងនៅវេលាម៉ោង១៖២០នាទីរសៀល ថ្ងៃសុក្រ ទី១០ ខែឧសភា ឆ្នាំ២០១៩នេះ នៅតាមបណ្ដោយផ្លូវ៦០ម៉ែត្រ ភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ។
សូមបញ្ជាក់ថា បុរសរងគ្រោះ មានអាយុជាង៤០ឆ្នាំ មិនទាន់ស្គាល់អត្តសញ្ញាណទេ ត្រូវបានរថយន្តសង្គ្រោះគ្លីនិកឯកជន សួគា៍ មកដឹកយកទៅសង្គ្រោះហើយ នៅកន្លែងកើតហេតុ កម្លាំងសមត្ថកិច្ចប៉ុស្តិ៍ព្រៃស និងកម្លាំងអធិការដ្ឋានខណ្ឌដង្កោ កំពុងចេញជួយអន្តរាគមន៍៕
