ភ្នំពេញៈ មានការស្រែកឆោឡោ ផ្អើលពេញភូមិ បន្ទាប់ពីប្រទះឃើញបុរសម្នាក់ ចងកសម្លាប់ខ្លួន មិនដឹងតាំងពីពេលណា នៅមុខផ្ទះជួល ។ ហេតុការណ៍នេះ បង្កឲ្យមានការភ្ញាក់ផ្អើលឡើងកាលពីវេលាម៉ោងជិត៧យប់ ថ្ងៃសុក្រ ទី២៤ ខែឧសភា ឆ្នាំ២០១៩ នៅខាងក្រោយមន្ទីរពេទ្យ សម្ភពក្បាលថ្នល់ ស្ថិតក្នុងភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
សពឈ្មោះ កុសល ពិសី ភេទប្រុស អាយុ២៧ឆ្នាំ សព្វថ្ងៃរស់នៅជាមួយអ៊ុំ មុខរបរមើលការខុសត្រូវផ្ទះជួលរបស់អ៊ុំខ្លួន នៅចំណុចខាងក្រោយមន្ទីរពេទ្យក្បាលថ្នល់ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតអ្នកជិតខាង បានឃើញបុរសខាងលើ មិនដឹងនិយាយទូរស័ព្ទជាមួយអ្នកណាទេ ដោយទឹកមុខក្រៀមក្រំ ហើយអ្នកជិតខាងបានគិតថា ទំនងជាមានវិបត្តិអ្វីមួយទើបមិនហ៊ានសួរនាំអ្វីទេ។ លុះមកដល់ម៉ោង៦ល្ងាចថ្ងៃដដែលនេះ ស្រាប់តែនារីម្នាក់ឈ្មោះ ចិត្តា អាយុ២២ឆ្នាំ មុខរបរសិស្ស បានបើកទ្វារមកឃើញបុរសខាងលើ បានចងកសម្លាប់ខ្លួន លើដើមខ្នុរស្លាប់បាត់ទៅហើយ មិនដឹងតាំងពីម៉ោងប៉ុន្មានទេ ទើបមានការភ្ញាក់ផ្អើលឆោឡោពេញភូមិ និងបានរាយការណ៍ប្រាប់សមត្ថកិច្ចមូលដ្ធានប៉ុស្តិ៍ចាក់អង្រែលើ ចុះមកត្រួតពិនិត្យកន្លែងកើតហេតុខាងលើ។
ក្រោយកើតហេតុ សមត្ថកិច្ចជំនាញ បានចុះទៅដល់ផ្ទះកើតហេតុ ដើម្បីត្រួតពិនិត្យ និងកោសលវិច្ច័យទៅលើសាកសពរបស់បុរសរងគ្រោះ បានបញ្ជាក់ថា នាងពិតជាបានស្លាប់ ដោយសារ តែ ការចងកធ្វើអត្តឃាតសម្លាប់ខ្លួនពិតប្រាកដមែន ទើបប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕
