ភ្នំពេញៈ ហ្គេមបាញ់ត្រីលើផ្សារស្ទឹងមានជ័យថ្មី ជាន់ទី៣ បើកលេងយ៉ាងរំភើយ ដោយមិនខ្លាចញញ្ជើតសមត្ថកិច្ចមូលដ្ឋានឡើង ធ្វើឲ្យមហាជន ក៏ដូចជាប្រជាពលរដ្ឋមានការរិះគន់យ៉ាងខ្លាំងទៅលើសមត្ថកិច្ច ពិសេសលោកមេប៉ុស្តិ៍ស្ទឹងមានជ័យទី១តែម្ដង។
ប្រជាពលរដ្ឋ លើកឡើងថា កន្លងមក អភិបាលរាជធានីភ្នំពេញ លោក ឃួង ស្រេង និងលោក ស ថេត ស្នងការនគរបាលរាជធានីភ្នំពេញ បានដាក់បទបញ្ជាយ៉ាងក្តៅកគុកឲ្យអភិបាលខណ្ឌទាំង១២ និងលោកអធិការខណ្ឌទាំង១២ លុបបំបាត់ និងចុះបង្ក្រាបល្បែងអស់ទាំងនោះ ដែលមាននៅក្នុងខណ្ឌ និងមូលដ្ឋានហេតុ ផ្ទុយទៅវិញសមត្ថកិច្ចខណ្ឌមានជ័យ ពិសេសលោកមេប៉ុស្តិ៍ស្ទឹងមានជ័យទី១ មិនបានស្ដាប់ និងយកចិត្តទុកដាក់ប្រសាសន៍របស់លោកអភិបាលរាជធានីភ្នំពេញ និងលោកស្នងការក្រុងភ្នំពេញឡើយ ថែមទាំងបណ្ដែតបណ្ដោយឲ្យមូលដ្ឋានខ្លួនសុទ្ធតែល្បែងបាញ់ត្រី និងអ៊ីធើណេត បើករីកដូចផ្សិត ជាក់ស្ដែងផ្សារស្ទឹងមានជ័យថ្មី ជាន់ទី៣ជាដើម កំពុងបើកលេងហ្គេមបាញ់ត្រីយ៉ាងរំភើយ ឬលោកមេប៉ុស្តិ៍រវល់តែអង្គុយរង់ចាំទទួលលាបសក្ការៈពីម្ចាស់ទីតាំងទាំងនោះ ទើបមិនហ៊ានចុះបង្គ្រាប?
ពលរដ្ឋ បន្តលើកឡើងថា កន្លងមកមានសិស្សសាលា និងក្មេងស្ទាវជាច្រើន បាននាំគ្នាពពាក់ពពូនប្រមូលផ្ដុំគ្នានៅក្នុងទីតាំងហ្គេមបាញ់ត្រីក្នុងផ្សារស្ទឹងមានជ័យថ្មី ជាន់ទី៣ មានអ្នកខ្លះគេចពីការរៀនសូត្រ យកលុយទៅលេងល្បែងហ្គេមបាញ់ត្រី អ្នកខ្លះមិនចូលផ្ទះមិនចូលសាលារៀន រីឯក្មេងខ្លះទៀតមិនមានលុយទៅលេង ចេញទៅធ្វើសកម្មភាព ឆក់ ប្លន់ លួច ជាដើម សុទ្ធតែចេញពីល្បែងហ្គេមទាំងនេះ។
ប្រជាពលរដ្ឋ រង់ចាំមើល ថាតើសមត្ថកិច្ចខណ្ឌមានជ័យ ពិសេសលោកមេប៉ុស្ដិ៍ស្ទឹងមានជ័យទី១ ហ៊ានបង្ក្រាប ឬយ៉ាងណា តើលោកមានវិធានការយ៉ាងណាចំពោះទីតាំងហ្គេមបាញ់ត្រី ដែលផ្ដល់ជាកន្លែងដល់សិស្សសាលាគេចពីការរៀនសូត្របែបនេះ?៕
