ភ្នំពេញៈ ជនជាតិចិនមួយក្រុម បើករថយន្តសេរីទំនើបមួយគ្រឿងល្មើសច្បាប់ចរាចរណ៍ ពោលគឺបញ្ច្រាសផ្លូវ ពេលនោះសមត្ថកិច្ចចរាចរណ៍ក្រុង បានធ្វើការឃាត់ ដើម្បីអប់រំ ស្រាប់តែជនជាតិចិនទាំងនោះ មិនព្រមឈប់ទេ បានបន្តដំណើរទៅមុខ ថែមទាំងបើកកៀរសមត្ថកិច្ចទៀតផង តែសំណាងសមត្ថកិច្ចអត់កើតអី ធ្វើឲ្យផ្អើលដល់ប្រជាពលរដ្ឋធ្វើដំណើរតាមដងផ្លូវចោមរោមមើលយ៉ាងច្រើនកុះករ។
ហេតុការណ៍នេះ កើតឡើងនៅវេលាម៉ោងប្រហែល២រសៀលថ្ងែទី៤ ខែមិថុនា ឆ្នាំ២០១៩ ក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។
សមត្ថកិច្ចចរាចរណ៍ក្រុង ដែលដាក់គោលដៅស្តុបផ្លូវត្រសក់ផ្អែម បានប្រាប់ឲ្យដឹងថា មុនពេលកើតហេតុ គឺមានបុរសជនជាតិចិនម្នាក់បើករថយន្តសេរីទំនើប ពណ៌ខ្មៅ ពាក់ស្លាកលេខ ភ្នំពេញ 2AM.2666 និងអ្នករួមដំណើរចំនួន៥នាក់ សរុបទាំងអស់៦នាក់ បានបើកបញ្រ្ចាសទិសដៅចរាចរណ៍ តាមបណ្ដាលផ្លូវនរោត្តម ហើយសមត្ថកិច្ច ក៏បានធ្វើការឃាត់ឲ្យចូលអែបកៀន ស្រាប់តែជនជាតិចិននោះ មិនបើកអែបកៀនទេ ថែមទាំងបើកកៀសមត្ថកិច្ច រួចបន្តបើទៅមុខទៀត។
សមត្ថកិច្ច បន្តថា ឃើញដូចនោះ សមត្ថកិច្ច ក៏បានជិះម៉ូតូដេញតាមពីក្រោយ លុះមកដល់ស្តុបត្រសក់ផ្អែម សមត្ថកិច្ចស្រែកអោយឈប់ ជនជាតិចិននោះ ក៏មិនឈប់ ទើបសមត្ថកិច្ចសម្រេចចិត្តឈប់ម៉ូតូពីមុខរថយន្ត កុំអោយបើកទៅមុខបន្ត ហើយប្រាប់អោយចុះមកតែមិនចុះទៀត ថែមទាំងដកទូរស័ព្ទថតសមត្ថកិច្ចទៀត ហើយសមត្ថកិច្ចព្យាយាមសម្រួលអោយពួកគេចុះ ដើម្បីធ្វើការអប់រំអស់រយៈពេលជិត២ម៉ោង ជនជាតិចិនទាំងនោះមិនព្រមចុះទៀត ទើបសមត្ថកិច្ចហៅរថយន្តស្ទួចមកស្ទួចទាំងរថយន្ត និងជនជាតិចិនទាំងនោះ យកទៅការិយាល័យចរាចរក្រុង ដើម្បីចាត់ការបន្ត៕