ខេត្តក្រចេះ៖ នៅថ្ងៃទី១៥ ខែសីហា ឆ្នាំ២០១៩ឧកញ៉ាឈើដ៏ល្បីល្បាញ លោក គង់ ក្រឹង និងកូនប្រសារប្រុស ឈ្មោះ ម៉ាត់ ណាស៊ាត បានចូលឆ្លើយបំភ្លឺ អស់រយៈពេល ១ថ្ងៃ ពាក់ព័ន្ធនឹងបទល្មើសព្រៃ នៅបញ្ជាការដ្ឋានកងរាជអាវុធហត្ថ ខេត្តក្រចេះ។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ លោកឧត្តមសេនីយ៍ត្រី អេង ហ៊ី បានបញ្ជាក់ថា ក្រោយការសាកសួរ សមត្ថកិច្ច បានសម្រេចឃាត់ខ្លួនលោកឧកញ៉ា គង់ ក្រឹង និងកូនប្រសាររបស់លោកឈ្មោះ ម៉ាត់ ណាស៊ាត។ ជនទាំងពីរ ពាក់ព័ន្ធនឹងបទល្មើសព្រៃឈើ។
លោកឧកញ៉ា គង់ គ្រឹង និងកូនប្រសារ ម៉ាត់ ណាស៊ាត ដែលជាម្ចាស់រោងសិប្បកម្ម ម៉ាត់ ណាស៊ាត មានទីលំនៅភូមិដីច្រាបថ្មី ឃុំ២ធ្នូ ស្រុកស្នួល ខេត្តក្រចេះ ត្រូវបានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ កាលពីថ្ងៃទី០១ ខែសីហា ឆ្នាំ២០១៩ បានចេញលិខិតកោះហៅ ឲ្យចូលឆ្លើយបំភ្លឺ នៅថ្ងៃទី១៥ ខែសីហា ឆ្នាំ២០១៩ នៅបញ្ជាការដ្ឋានកងរាជអាវុធហត្ថ ខេត្តក្រចេះ ពាក់ព័ន្ធបទល្មើសព្រៃឈើ។
ការចាប់ខ្លួនលោកឧកញ៉ាឈើដ៏ល្បីល្បាញ គង់ ក្រឹង ត្រូវបានធ្វើឡើងក្រោយពេលលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដឹកនាំចុះពិនិត្យទីតាំងឃ្លាំងស្តុកឈើចំនួន៩ ទីតាំង របស់លោកឧកញ៉ា គង់ ក្រឹង នៅស្រុកស្នួល ខេត្តក្រចេះ កាលពីថ្ងៃទី៥ ខែសីហា ឆ្នាំ២០១៩។ អំឡុងពេលចុះប្រតិបត្តិការនោះ លោកឧកញ៉ា គង់ ក្រឹង មិនមានវត្តមាន នៅក្នុងឃ្លាំងឈើទេ។
ក្នុងប្រតិបត្តិការបង្ក្រាបបទល្មើសព្រៃឈើ ចាប់តាំងពីខែកក្កដា ឆ្នាំ២០១៩ គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជូនជនសង្ស័យចំនួន ១៥នាក់ ទៅកាន់តុលាការ ក្នុងនោះ មានទាំងឧកញ៉ារកស៊ីឈើដ៏ល្បីល្បាញ ស៊ឹង សំអុល ផង។ រីឯមនុស្សចំនួន ២១នាក់ផ្សេងទៀត ដែលមានទាំងមន្ត្រីនៅមន្ទីរពាក់ព័ន្ធផង កំពុងតាមចាប់ខ្លួន ពាក់ព័ន្ធនឹងបទល្មើសព្រៃឈើ នៅភូមិភាគឦសាន ពិសេសក្នុងខេត្តមណ្ឌលគីរី និងខេត្តក្រចេះ ជាដើម៕
