Saturday, August 3, 2019

សមត្ថកិច្ចឆ្មក់​បង្ក្រាប​​​បន​ល្បែង​កណ្ដាល​ក្រុង​ ឃាត់​ខ្លួន​មនុស្ស​៣០​នាក់ និងសម្ភារៈមួយចំនួន

ភ្នំពេញ​ ៖​ បើតាមលោក​វរសេនីយ៍ឯក ទៀង ច័ន្ទ​សារ អធិការ​នគរបាល​ខណ្ឌ​ដូនពេញ​បាន​ឲ្យ​ដឹង​ថា កាលពី​ព្រលប់​ថ្ងៃទី​២ ខែសីហា ឆ្នាំ​២០១៩ សមត្ថកិច្ច​នគរបាល​សន្តិសុខ​ផ្ទៃក្នុង និង​កម្លាំង​នាយកដ្ឋាន​ប្រឆាំង​បទល្មើស​បច្ចេកវិទ្យា សហការ​ជាមួយ​កម្លាំង​ប៉ុស្តិ៍​នគរបាល​រដ្ឋបាល​ស្រះចក បាន​ចុះបង្ក្រាប​ទីតាំង​ភ្នាល់​បាល់​មួយ​កន្លែង​ដែល​មាន​ទីតាំង​ស្ថិតនៅ ផ្ទះ​លេខ​១៤ ផ្លូវ​៤៧ ភូមិ​៨ សង្កាត់​ស្រះចក ខណ្ឌ​ដូនពេញ រាជធានី​ភ្នំពេញ។

ប្រតិបត្តិការនេះ ដោយបាន​ការអនុញ្ញាត​ពី​លោក គុជ គីម​ឡុង ព្រះរាជអាជ្ញារង និង​បានធ្វើ​កំណត់ហេតុ​ឆែកឆេរ​ដល់ទី​តាំង ផ្ទះ​លេខ​១៤ ផ្លូវ​៤៧ ភូមិ​៨ សង្កាត់​ស្រះចក ខណ្ឌដូនពេញ រាជធានី​ភ្នំពេញ ដែល​មាន​ម្ចាស់​ឈ្មោះ នាក់ គ​ន្ធា ភេទ​ប្រុស អាយុ​២៣​ឆ្នាំ ជនជាតិខ្មែរ។

ក្នុងការ​បង្ក្រាប​បន​ល្បែង​នេះ ​សមត្ថកិច្ច​បាន​ប្រមូល​ទូរស័ព្ទ (​អ្នកលេង​) ចំនួន ២១​គ្រឿង ទូរស័ព្ទ​ភ្នាក់ងារ​បម្រើ​ល្បែង​ចំនួន ១៣​គ្រឿង បញ្ជី​និង​​បុង​ភ្នាល់​បាល់​មួយចំនួន លិខិតអនុញ្ញាត ចំនួន ០២​ច្បាប់ កុំព្យូទ័រ​លើ​តុ​ចំនួន​២៦​គ្រឿង CPU​កុំព្យូទ័រ ចំនួន​២៦​គ្រឿង ម៉ាស៊ីន​ព្រី​ន​ចំនួន ១​គ្រឿង ទូរទស្សន៍​ចំនួន ៤ គ្រឿង ឃាត់ខ្លួន​អ្នកលេង និង​អ្នក​បម្រើ​សេវា​ល្បែង​ចំនួន​៣០​នាក់ ម៉ូតូ​ចំនួន​៣០​គ្រឿង ( បញ្ជាក់ ម៉ូតូ ចំនួន ២៩ គ្រឿង ផ្ញើទុក​នៅ​អធិការដ្ឋាន​នគរបាល​ខណ្ឌ​ដូនពេញ)។

បច្ចុប្បន្ន​វត្ថុតាង និង​ជនសង្ស័យ​ខាងលើ សមត្ថកិច្ច​ចម្រុះ​សម្រេច​ដកហូត និង​យក​ទៅ​នាយកដ្ឋាន​ប្រឆាំង​បទល្មើស​បច្ចេកវិទ្យា ដើម្បី​ធ្វើការ​ស្រាវជ្រាវ​បន្ត៕

Feature Ads