ភ្នំពេញៈ លោក George Edgar ឯកអគ្គរដ្ឋទូត សហភាពអឺរ៉ុបប្រចាំកម្ពុជា (EU) ចប់អាណត្តិ បានថ្លែងថា EU ប្រកាសជួយកម្ពុជា នូវទឹកប្រាក់ជាង១០០លានដុល្លារ សម្រាប់វិស័យជលផល នៅកម្ពុជា ។
ក្នុងជំនួបពិភាក្សាការងារ ជាមួយសម្ដេចតេជោ ហ៊ុន សែន នាយករដ្ឋមន្រ្តីកម្ពុជា នៅថ្ងៃទី១៩ ខែសីហា ឆ្នាំ២០១៩ លោក George Edgar បានជំរុញឲ្យវិស័យកសិកម្មនៅកម្ពុជា ដើម្បីឲ្យមានការរីកចម្រើនទៅមុខបន្ដទៀត។
លោកមានប្រសាសន៍ថា “EU នឹងប្រកាសជួយដល់កម្ពុជា នៅថ្ងៃពុធខាងមុខនេះ នូវទឹកប្រាក់ជាង១០០លានដុល្លារ សម្រាប់វិស័យជលផល” ។
លើសពីនេះទៀតឯកអគ្គរដ្ឋទូត EU បញ្ជាក់អំពីការជួយទៅដល់វិស័យ បម្រែបម្រួលអាកាសធាតុ ដែលកម្ពុជា ជាប្រទេសមួយនៅតំបន់អាស៊ីអាគ្នេយ៍ ដែលងាយរងគ្រោះដោយបម្រែបម្រួល អាកាសធាតុ ដែលនេះក៏ជាបញ្ហាពិភពលោកផងដែរ។ លោកថា មិនតែប៉ុណ្ណោះ EU នឹងបន្តជួយលើវិស័យព្រៃឈើ ដែលបច្ចុប្បន្នជាការងារអាទិភាព របស់រាជរដ្ឋាភិបាលកម្ពុជា ក្នុងការប្រឆាំងការ កាប់បំផ្លាញព្រៃឈើខុសច្បាប់។
ជាការឆ្លើយតប សម្ដេចតេជោស្វាគមន៍ ចំពោះការផ្ដល់ជំនួយ១០០លានដុល្លារ របស់EUដែលរាជរដ្ឋាភិបាល បានលុបចោលនូវឡូនេសាទ ហើយផ្ដល់ឲ្យសហគមន៍ប្រជាពលរដ្ឋ ដើម្បីជាផលប្រយោជន៍ របស់ប្រជាជនតែម្ដង ។ សម្ដេចរំលឹកថា កាលពីឆ្នាំ២០១២ EU បានជួយទៅដល់វិស័យមួយនេះ ។
ពាក់ព័ន្ធនឹងដំណើរការ របស់តុលាការខ្មែរក្រហម ដែលនឹងមកដល់ទីបញ្ចប់នៅពេលខាងមុខនេះ សម្ដេចតេជោ អរគុណ EU បានជួយវិភាគទាន ក្នុងការស្វែងរកយុត្តិធម៌ ចំពោះប្រជាពលរដ្ឋកម្ពុជា ជាពិសេសមិនត្រឹមតែប្រជាពលរដ្ឋ បាត់បង់អាយុជីវិតប៉ុណ្ណោះទេ ថែមទាំងជួយដល់ប្រជាពលរដ្ឋរងគ្រោះ ដែលបានឆ្លងកាត់ របបប្រល័យពូជសាសន៍។
សូមរំលឹកថា EU នឹងបន្តកិច្ចសហប្រតិបត្តិការ យ៉ាងជិតស្និទ្ធជាមួយរាជរដ្ឋាភិបាលកម្ពុជា ជាពិសេសការផ្ដោត ទៅលើគ្រប់វិស័យ ការបន្តធ្វើការជាមួយគ្នាក្នុងភាពជាដៃគូ។ នៅពេលខាងមុខ កម្ពុជានឹងធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ីអឺរ៉ុប នៅពេលនោះ ថ្នាក់ដឹកនាំ រដ្ឋជាសមាជិកនៃសហភាពអឺរ៉ុបជាច្រើន ក៏នឹងអញ្ជើញមក ចូលរួមកិច្ចប្រជុំកំពូលនេះផងដែរ៕
ផ្ដល់សិទ្ធិដោយ៖ campost.news