ការធ្វេសប្រហែសរបស់អ្នកដឹកសំរាម ធ្វើឲ្យអ្នកជំនាញពន្លត់អគ្គិភ័យម្នាក់ ស្លាប់នៅលើដងផ្លូវ គួរឲ្យសោកស្តាយ

អានផ្សេងទៀត

ព្រះសីហនុៈ ស្នងការដ្ឋាននគរបាល ខេត្តព្រះសីហនុ បានឲ្យដឹងថា ភ្នាក់ងារពន្លត់អគ្គិភ័យ ម្នាក់ បានបាត់បង់ជីវិត នៅលើដងផ្លូវជាតិលេខ៤ ត្រង់នៅចំណោតអូរត្រាវ សង្កាត់លេខ១ ក្រុងព្រះសីហនុ ដោយសារតែរថយន្ដដឹកសំរាមមួយគ្រឿងខូច ហើយចតនៅលើដងផ្លូវមិន បានដាក់ស្លាកសញ្ញាឲ្យអ្នកធ្វើចរាចរណ៍ បានឃើញនៅពេលយប់។

ករណីនេះ កើតហេតុឡើងនៅវេលាម៉ោង១១៖៣០នាទីក្នុងរាត្រីថ្ងៃទី១៥ ខែសីហា ឆ្នាំ២០១៩ ក្នុងពេលដែលជនរងគ្រោះជិះម៉ូតូម៉ាក XR230 ពណ៌ស-ក្រហមស្លាកលេខ ភ្នំពេញ1HK-6543 ធ្វើដំណើរទៅធ្វើការពេលយប់ពីក្រុងព្រះសីហនុ ទៅព្រលានយន្តហោះកងកេង បានបុកពីក្រោយ រថយន្តដឹកសំរាមដែលឈប់ចតនៅពេលយប់គ្មានដាក់ស្លាកសញ្ញា បណ្ដាលឲ្យជនរងគ្រោះស្លាប់នៅកន្លែងកើតហេតុ។

ជនរងគ្រោះ ឈ្មោះ ញុល សារឿន ភេទប្រុស អាយុ២៩ឆ្នាំ ធ្វើការនៅព្រលានយន្តហោះ កងកេង ខេត្តព្រះសីហនុ មុខជំនាញខាងពន្លត់អគ្គិភ័យ មានទីលំនៅភូមិ១ សង្កាត់លេខ១ក្រុង/ខេត្តព្រះសីហនុ ។

ចំណែករថយន្តដឹកសំរាមម៉ាក HYUNDAI ពណ៌ទឹកសមុទ្រ គ្មានស្លាកលេខ កម្មសិទ្ធិរបស់ក្រុមហ៊ុន ដឹកសំរាម KSWM មានទីតាំងភូមិ១ សង្កាត់លេខ១ ក្រុង/ខេត្តព្រះសីហនុ។

ក្រោយកើតហេតុរថយន្ត និងម៉ូតូ សមត្ថកិច្ចជំនាញ យកមករក្សារទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ៕