ព្រះវិហារ ៖ ពិធីអាពាហ៍ពិពាហ៍មួយកំពុងតែប្រារព្ធ ត្រូវបានសមត្ថកិច្ចនគរបាលអន្តោប្រវេសន៍ខេត្តព្រះវិហារ បានចុះត្រួតពិនិត្យ និងឃាត់បញ្ឈប់ កាលពីថ្ងៃទី១៩ ខែកញ្ញា ឆ្នាំ២០១៩ ស្ថិតភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ ដែលពិធីរៀបអាពាហ៍ពិពាហ៍នេះរវាងជនជាតិចិនម្នាក់ ដែលបានមករៀបអាពាហ៍ពិពាហ៍ជាមួយស្ត្រីខ្មែរដោយខុសច្បាប់។
ជនជាតិចិនបានមករៀបអាពាហ៍ពិពាហ៍ជាមួយស្ត្រីខ្មែរ គឺមានឈ្មោះ LIANG YANBING ភេទប្រុស អាយុ ៣៨ឆ្នាំ កាន់លិខិតឆ្លងដែនលេខ EC៣៥៩៦៧៣៥ ផុតកំណត់ថ្ងៃទី២៦ ខែកុម្ភៈ ឆ្នាំ២០២៨ និងទិដ្ឋាការលេខEI ០១៩៨៦២៤៣ ផុតកំណត់ថ្ងៃទី១៥ ខែតុលា ឆ្នាំ២០១៩ ស្នាក់នៅក្រុងព្រះសីហនុ។
រីឯស្ត្រីខ្មែរគឺមានឈ្មោះ ស៊ីម ស្រីស្ដើង អាយុ ២៧ឆ្នាំ មានទីលំនៅស្ថិតក្នុងភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ
សមត្ថកិច្ចនគរបាលស្រុកគូលែន បានឲ្យដឹងថា ករណីជនជាតិចិនបានមករៀបអាពាហ៍ពិពាហ៍ជាមួយស្ត្រីខ្មែរដោយខុសច្បាប់ គឺត្រូវបានកំលាំងនគរបាលអន្តោប្រវេសន៍ខេត្តព្រះវិហារ ចុះត្រួតពិនិត្យដោយគ្មានលិខិតអនុញ្ញាត ហើយត្រូវបានកំលាំងជំនាញចុះទៅបញ្ឈប់ការរៀបអាពាហ៍ពិពាហ៍។
