រដ្ឋមន្រ្តីក្រសួងសាធារណការថាអំពើពុករលួយនៅតាមជញ្ជីងថ្លឹងរថយន្តគឺជាជំងឺរ៉ាំរ៉ៃធ្វើឱ្យខូចផ្លូវ លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានថ្លែងថា លោកព្រមទទួលយកកំហុសដែលលោកមានការធ្វេសប្រហែសពេក ក្នុងការបណ្ដោយឱ្យមានការប្រព្រឹត្តអំពើពុករលួយនៅតាមកន្លែងជញ្ជីងថ្លឹងរថយន្ត។
ដែលលោកបានអះអាងថា ការដឹកលើសទម្ងន់ដោយសារជញ្ជីងថ្លឹងមានអំពើពុករលួយ គឺជាជំងឺរ៉ាំរ៉ៃ ដែលបានធ្វើឱ្យខូចផ្លូវនាពេលកន្លងមក។ លោកថា«ខ្ញុំព្រមទទួលខុសរឿងជញ្ជីងនេះ ដោយសារតែខ្ញុំមិនបានតាមដានឱ្យបានដិតដល់។ ខ្ញុំប្រហែស ខ្ញុំបណ្ដោយពេក អ៊ីចឹង!ខ្ញុំទទួលខុស អត់មានខុសពីណាគេទេ គឺខុសមកពី ស៊ុន ចាន់ថុល ដោយសារ ស៊ុន ចាន់ថុល នេះ មិនបានរៀបចំការងារប្រព័ន្ធគ្រប់គ្រងតាមអនុក្រឹត្យលេខ១៤១ យើងត្រូវឱ្យយើងរៀបចំគណៈកម្មការត្រួតពិនិត្យយានយន្តដឹកទំនិញលើសទម្ងន់ ដែលខ្ញុំជាប្រធាន ដែលអនុប្រធានមកពីក្រសួងមហាផ្ទៃ និងមានរដ្ឋលេខាធិការមកពីក្រសួងហិរញ្ញវត្ថុ អាជ្ញាធរដែនដី និងប្រធានមន្ទីរនៅក្នុងហ្នឹង»។
លោកបញ្ជាក់ថា លោកនឹងរៀបចំក្រុមការងារនេះឱ្យបានត្រឹមត្រូវឡើងវិញ ហើយនឹងមានការរៀបប្រព័ន្ធITតាមដាននៅតាមជញ្ជីងថ្លឹងទាំងអស់ រួមទាំងការបំពាក់កាមេរ៉ា ដើម្បីថតនិងបញ្ជូនទិន្នន័យអំពីការថ្លឹងរថយន្តមកកាន់ប្រព័ន្ធរបស់ក្រសួង ដើម្បីតាមដាន ដែលលោកបញ្ជាក់ថា ការធ្វើបែបនេះ នឹងបញ្ឈប់បានការប្រព្រឹត្តអំពើពុករលូយនៅតាមជញ្ជឹងថ្លឹងរថយន្តទាំងនោះ៕
ផ្ដល់សិទ្ធិដោយ៖ KhmerNas