សម្តេចនាយករដ្ឋមន្រ្តី ហ៊ុន សែន មានប្រសាសន៍ថា ភាពភ័យខ្លាច និងការរើសអើង បានវាយប្រហារខ្លាំងលើសេដ្ឋកិច្ចកម្ពុជា។ សម្តេចចង់សំដៅចំពោះពលរដ្ឋ ដែលកំពុងភ័យខ្លាចមេរោគ COVID-19 និងការរើសអើងពូជសាសន៍ ជាមូលហេតុនាំឲ្យកើតមានវិបត្តិសេដ្ឋកិច្ច នៅក្នុងតំបន់ និងពិភពលោក។ សម្តេច ថ្លែងបែបនេះ នៅក្នុងពិធីប្រគល់សញ្ញាបត្រដល់គរុសិស្ស គរុនិស្សិតបញ្ចប់ការសិក្សា នៅព្រឹកថ្ងៃទី១៨ ខែកុម្ភៈ ឆ្នាំ២០២០។សម្តេចនាយករដ្ឋមន្រ្តីសង្កត់ធ្ងន់ថា «ការភ័យខ្លាច និងការរើសអើងកំពុងវាយប្រហារសេដ្ឋកិច្ចហើយ…រឿងកើតចេញពីការខ្លាចជ្រុស និងការរើសអើង នាំឲ្យកើតមានវិបត្តិ …ដំបូងបំផុតវៃផាំងទៅលើទេសចរ មិនថាប្រទេសណាទេ ធ្លាក់ទេសចរណ៍ទាំងអស់ រាប់ទាំងកម្ពុជា..ទេសចរអឺរ៉ុបអត់មកអាស៊ី ដោយសារតែខ្លាចឆ្លង ឯពួកអាស៊ី អ្នកដែលធ្វើដំណើរច្រើនជាងគេ គឺចិន ដែលចេញធ្វើដំណើរ ១២០លានទៅ ១៥០លាននាក់ទៅកាន់ពិភពលោក ហើយចូលមកកម្ពុជា កាលពីឆ្នាំមុន មានជាង២លាននាក់។
ក្រៅពីប៉ះទង្គិចលើសេវាទេសចរ សេវាដឹកជញ្ជូនក៏ជួបបញ្ហាដូចគ្នាផងដែរ។ បន្ទាប់មកគឺវត្ថុធាតុដើម ដែលជាកត្តាធំបំផុត។
សម្តេចលើកឡើងថា ប្រទេសមួយចំនួន បានបិទរោងចក្រហើយ ដោយសារខ្វះវត្ថុធាតុដើម នាំយកមកពីចិន។
សម្តេចមានប្រសាសន៍ថា« សាច់ក្រណាត់ភាគច្រើននាំយកមកពីប្រទេសចិន ផ្គត់ផ្គង់កម្ពុជា ផ្គត់ផ្គង់វៀតណាម នាំចូលទៅបង់ក្លាដេស និងនាំទៅសឹងតែគ្រប់ទីកន្លែង»៕
ផ្ដល់សិទ្ធិដោយ ៖ khmernas
