√ អភិបាលស្រុកបន្ទាយស្រីសម្រេចទិញត្រសក់ផ្អែមទាំងអស់ពីចម្ការរបស់កសិករ

លោក ឃឹម ហ្វីណង់ អភិបាលស្រុកបន្ទាយស្រីខេត្តសៀមរាប បានសម្រេចទិញត្រសក់ផ្អែមពីកសិករពី២០ទៅ៣០តោន ដើម្បីទៅលក់បន្តដោយមិនយកប្រាក់ចំនេញនៅក្នុងផ្សារហេរីថេកនៅថ្ងៃទី១៨កុម្ភៈនេះ ព្រមទាំងអំពាវនាវឱ្យពលរដ្ឋនៅសៀមរាបនិងភ្នំពេញ ជួយទិញត្រសក់ទាំងនេះ។

លោកសរសេរនៅលើទំព័រហ្វេសប៊ុកថា៖«គ្រាន់តែក្នុងរយៈពេលជាង១ម៉ោងសោះ ខ្ញុំទទួលបានការសន្យាទិញត្រសក់ផ្អែមបានជាង១០,០០០គីឡូ ពីសំណាក់សាធារណៈជនមកពីទូទាំងប្រទេសកម្ពុជារួចបាត់ទៅហើយ។ខ្ញុំសម្រេចចិត្តថានឹងទទួលខុសត្រូវម៉ៅទិញត្រសក់ផ្អែមទាំងអស់ក្នុងចំការទាំងមូល ដែលមានចំនួនសរុបប្រមាណពី២០តោន ទៅ៣០តោន យកមករ៉ាប់រងចែកចាយបន្តជូនដោយមិនមានយកប្រាក់ចំណេញបន្ថែមឡើយ និងធ្វើការលើកកម្មវិធីលក់ធំនៅផ្សារហេរីថេក ពីថ្ងៃ២០កុម្ភៈ?មកថ្ងៃ១៨កុម្ភៈវិញ»។

អភិបាលស្រុករូបនេះបន្តថា ត្រសក់ផ្អែមរបស់កសិករក្នុងស្រុកបន្ទាយស្រី បានធ្លាក់ចុះតម្រូវការយ៉ាងកំហុគ៩០%ក្នុងឆ្នាំនេះ ដែលកន្លងមក តែងលក់ចេញទៅតាមសណ្ឋាគារ ភោជនីយដ្ឋាន ផ្សារទំនើប និងតំបន់ទេសចរណ៍នានានៅក្នុងខេត្តសៀមរាប៕