ឈ្មោះថាល្បែងទាញព្រ័ត្រ គឺសំដៅទៅដល់ខ្សែដែកគេយកមកទាញសាកកម្លាំងឱ្យដឹងឈ្នះចាញ់។ បែងទាញព្រ័ត្រជាល្បែងដែលមានប្រជាប្រិយមួយក្នុងចំណោមល្បែងមួយចំនួនទៀតរួមមានបោះអង្គញ់ ចោលឈូង និងលាក់កន្សែងជាដើម ដែលពលរដ្ឋខ្មែរតែងនិយមលេងក្នុងពិធីបុណ្យចូលឆ្នាំថ្មី។ លើសពីនេះទាញព្រ័ត្រក៏ត្រូវបានអង្គការយូណេស្កូ (UNESCO) បញ្ចូលជាបេតិកភណ្ឌវប្បធម៌អរូបិយរបស់មនុស្សជាតិកាលពីឆ្នាំ២០១៥។
សមាសភាពអ្នកលេងល្បែងនេះគឺគេត្រូវបែងចែកជា២ក្រុម ដោយក្រុមម្ខាងៗមានអ្នកលេងយ៉ាងតិច៥នាក់ ឬចាប់ពី១០នាក់ឡើងទៅ។ ល្បែងនេះធ្វើឱ្យមានភាពសប្បាយរីករាយ ដោយអ្នកលេងស្រែកហ៊ោកញ្ចៀវព្រមៗគ្នា ទៅតាមការប្រឹងកម្លាំងរបស់គេរៀងៗខ្លួន ចំណែកអ្នកទស្សនាវិញក៏ខំប្រឹងស្រែកហ៊ោជួយលើកទឹកចិត្ត ឬជំរុញដល់អ្នកលេងឱ្យប្រឹងទាញព្រ័ត្រយកឈ្នះក្រុមម្ខាងៗ ដែលគេគាំទ្រ។
ដោយសារតែល្បែងនេះនៅតែមានតម្លៃក្នុងសហគមន៍ខ្មែរគ្រប់ទិសទីនេះ ហើយទើបគណៈកម្មការអន្តររដ្ឋាភិបាលនៃអង្គការយូណេស្កូបញ្ចូលល្បែងនេះជាបេតិកភណ្ឌវប្បធម៌អរូបិយនៃមនុស្សជាតិទៅតាមសំណើរួមគ្នាមួយនៃប្រទេសចំនួន៤ គឺកម្ពុជា ហ្វីលីពីន ប្រទេសកូរ៉េ និងវៀតណាម ដែលក្រុមប្រទេសទាំងនេះដែលមានល្បែងប្រហាក់ប្រហែលគ្នា។
ប្រភព៖ សហព័ន្ធកីឡាបាល់ទាត់កម្ពុជា