header ads

Sponsor

កាលពីរដូវក្ដៅ​​ឆ្នាំ២០០៩ អតីត​អ្នក​ចាត់ការ​ក្រុម​បិសាច​ក្រហម​គឺលោក Alex Ferguson បាន​ព្យាយាម​ជំរុញ​ឱ្យ Ronaldo ផ្ទេរ​ទៅ​ក្លឹប Barcelona ជំនួស​ក្លឹប Real Madrid ប៉ុន្តែកីឡាករ​សញ្ជាតិ​ព័រទុយហ្កាល់​រូបនេះ​ បាន​សម្រេច​ចិត្ត​ជ្រើស​យក​ក្លឹបអធិរាជស​ក្នុងតម្លៃផ្ទេរ​ ៨០លានផោន​។

គួររម្លឹក​ផងដែរថា ជាមួយក្រុមអធិរាជស Ronaldo បានឈ្នះ​ពាន La Liga ២លើក ពានរង្វាន់ Champions League ៤លើក ពានរង្វាន់​ស្បែកជើងមាសប្រចាំបាល់ទាត់អឺរ៉ុប​ ៣លើក និងពានរង្វាន់ Ballon d’Or ៤លើក​ពេលនៅរាជធានីអេស្ប៉ាញ​ មុន​នឹងចាកចេញ​ទៅ​ក្លឹប Juventus ក្នុងឆ្នាំ២០១៨ ក្នុងនាមជាកីឡាករ​ដែល​រក​គ្រាប់បាល់​បានច្រើនជាងគេបំផុត​ក្នុងប្រវត្តិសាស្ដ្រ​របស់ក្លឹប Real Madrid ដោយរក​បាន ៤៥១គ្រាប់។

ការប្រជែងគ្នារវាង Ronaldo ជាមួយ​ Messi ក្នុងអំឡុងពេល ៩ឆ្នាំ​ដែលគេ​លេង​នៅអេស្ប៉ាញ​ជាព្រឹត្តិការណ៍​មួយដ៏សំខាន់​នៅ​ក្នុងវិស័យ​កីឡា​បាល់ទាត់សម័យទំនើប។ យ៉ាងណាមិញ ពួកគេទាំងពីរ​ស្ទើរ​តែបាន​លេង​រួមគ្នា​នៅ​ក្នុង​ក្រុម​តែមួយទៅហើយ ប្រសិនបើ​បំណង​របស់​លោក Ferguson បានសម្រេច។

យោងតាម​សម្ដី​របស់​លោក Ramon Calderon ដែលជាអតីត​ប្រធាន​ក្លឹប Real Madrid លោក Alex Ferguson មិនសប្បាយចិត្ត​​នោះទេ ពេលដែលក្លឹប​នេះ​ទាក់ទងចង់បាន​ Ronaldo ទើបលោក​រកវិធី​ធ្វើយ៉ាងណាឱ្យ Ronaldo ប្ដូរ​មក​ Barcelona ជំនួសវិញ។

លោក Calderon បាននិយាយ​ប្រាប់សារព័ត៌មាន AS ថា៖ “ការចុះ​កិច្ចព្រមព្រៀង​នោះ​ត្រូវបានធ្វើឡើងរវាងខ្ញុំជាមួយ Ronaldo នៅចន្លោះឆ្នាំ២០០៧ និង២០០៨។ ការចរចា​លើក​នោះ​ជា​ការ​ចរចា​មួយដ៏លំបាក​ជាមួយ​ក្លឹប Manchester United ព្រោះពួកគេ​មិនចង់បាត់បង់​កីឡាករ​រូបនេះ ប៉ុន្តែ Ronaldo ដឹងច្បាស់ថាគេចង់បានអ្វី”។

“គេចង់ចូលរួមជាមួយ​ក្លឹប Real Madrid ហើយនោះ​ជាឱកាស​តែមួយគត់របស់យើង ហេតុ​នេះខ្ញុំបានឆ្លៀតក្ដាប់ឱកាស​នោះឱ្យបាន”។

លោក Calderon បាននិយាយបន្ត​ទៀតថា៖ “លោក Ferguson មិនចង់​ឱ្យ Ronaldo ចាកចេញ​នោះទេ ហើយជាពិសេស​ លោក​មិនចង់ឱ្យគេប្ដូរទៅ Real Madrid ជាក្លឹប​ដែល​ធ្លាប់ឈ្នះពាន​ច្រើន​ជាង​ក្រុមបិសាចក្រហម ហេតុនេះហើយទើប​លោក​ចង់លក់គេ​ឱ្យ Barcelona ជំនួសវិញ”។

“Barcelona រីករាយណាស់​ដែលទទួលបានឱកាសនេះ ប៉ុន្តែ Ronaldo ច្បាស់លាស់ចំពោះបំណង​ប្រាថ្នា និងកិច្ចសន្យា​ដែលគេបានចុះហត្ថលេខារួចហើយ”។

“យើងបានចុះហត្ថលេខាលើកិច្ចព្រមព្រៀងមួយ​ដែលបានចែងថា ប្រសិនបើភាគីខាងក្លឹប​ ឬកីឡាករ​ប្ដូរចិត្តវិញ មិនគោរពតាមកិច្ចសន្យា ត្រូវផ្ដល់សំណង ៣០លានអឺរ៉ូ​ទៅភាគីម្ខាងទៀត”។ 

ទោះបីជាលោក Calderon បានអះអាងថាជាអ្នក​ចរចា​ទិញ Ronaldo បានសម្រេច​ក្ដី គឺលោក Florentino Perez ទៅវិញទេ​ដែលបានបញ្ចប់​ដំណើរការ​ផ្ទេរ​នេះ​ជាស្ថាពរនៅក្នុងរដូវក្ដៅ ឆ្នាំ២០០៩។

ការផ្ទេរនេះ​កើតឡើងនៅប៉ុន្មានខែ​ក្រោយពេលដែល​ក្លឹប Barcelona បំបាក់ក្លឹប Man United ក្នុងលទ្ធផល ២ទល់នឹងសូន្យនៅវគ្គ​ផ្ដាច់ព្រ័ត្រ​នៃការប្រកួត​ Champions League នៅឆ្នាំ២០០៩ ដែលកាលនោះគឺកីឡាករ Samuel Eto’o និង Messi ជាអ្នករក​បានគ្រាប់បាល់។ 

Messi ធ្លាប់ទទួលស្គាល់ថា​គេនឹក​ដល់គ្រាដែល Ronaldo នៅលេងក្នុងលីគ​ La Liga។ កាលពីខែវិច្ឆិកា Messi បាននិយាយប្រាប់សារព័ត៌មាន RAC 1 ថា៖ “ខ្ញុំចង់ឱ្យ Cristiano បន្តលេងនៅលីគអេស្ប៉ាញជាង គឺលេងនៅ Madrid ដដែល។ ខ្ញុំគិតថាបើគេនៅទីនេះ គេអាចផ្ដល់ភាពសំខាន់ដល់ការប្រជែងរបស់យើង ដល់ការប្រកួត Clasico និង La Liga ទាំងមូល​ផងដែរ”៕

ផ្ដល់សិទ្ធិដោយ៖ khmernas

Feature Ads

Previous Post Next Post
Sponsor