header ads

ភ្នំពេញ៖ សាលារាជធានីភ្នំពេញ ប្រាប់ឱ្យពលរដ្ឋ ដែលមិនទាន់បង់ថ្លៃសេវាសំរាម រួសរាន់បង់ឱ្យទាន់ពេលវេលា ដើម្បីបញ្ចៀសការផាកពិន័យ។ នេះបើតាមសេចក្តីជូនដំណឹងរបស់សាលារាជធានីភ្នំពេញ នៅថ្ងៃទី២៥ ឧសភា។

សាលារាជធានីភ្នំពេញ បានកត់សម្គាល់ឃើញថា ចាប់តាំងពីអាជ្ញាធរសម្រេចឱ្យពលរដ្ឋបង់ថ្លៃសេវាសំរាម តាមរយៈប្រព័ន្ធអេឡិចត្រូនិចរហូតមកដល់ពេលនេះ គឺមានប្រជាពលរដ្ឋភាគច្រើនបានបង់ថ្លៃសេវាប្រមូលសំរាមរួចហើយ ប៉ុន្ដែពលរដ្ឋមួយចំនួន មិនទាន់បានបំពេញកាតព្វកិច្ចបង់ថ្លៃសេវាប្រមូលសំរាម និងសំណល់រឹងនេះនៅឡើយ។

សាលារាជធានីភ្នំពេញ បានបញ្ជាក់ថា បើសិនជាពលរដ្ឋនៅតែមិនបង់ថ្លៃសេវាសំរាមទេ នោះអាជ្ញាធរនឹងបញ្ចេញបញ្ជីឈ្មោះអ្នកដែលមិនទាន់បង់ថ្លៃសេវាសំរាម និងសំណល់រឹងជាសាធារណៈ តាមបណ្ដាញសង្គម និងប្រព័ន្ធផ្សព្វផ្សាយនានា។ ក្រៅពីនេះអាជ្ញាធរ ក៏នឹងកត់ត្រាជាបំណុល ហើយអនុវត្តតាមវិធានការរដ្ឋបាល ដោយបិទអាជីវកម្ម ឬសេវាកម្មបណ្ដោះអាសន្ន និងអនុវត្តវិធានការផ្សេងៗទៀត តាមការចាំបាច់។

រដ្ឋបាល​រាជធានី​ភ្នំពេញ បានដាក់​អនុវត្ត​នូវ​ការទូទាត់​បង់ថ្លៃ​សេវា​សំរាម​ប្រចាំខែ តាមរយៈ​ប្រព័ន្ធ​អេឡិចត្រូនិក បញ្ជរ​ទូទាត់​នៅតាម​ធនាគារ  ទីភ្នាក់ងារ​វេរ​លុយ​ផ្សេងៗ​ដែលមាន​នៅក្នុង​កម្មវិធី​ទូរ​សព្ទ និង​នៅ​ទីសាធារណៈ ចាប់តាំងពី​ខែកុម្ភៈ ឆ្នាំ​២០២០​មកនេះ​។ ពលរដ្ឋ​ត្រូវ​តែម​កបង់សេវាប្រមូលសំរាមនេះ ក្នុង​រយៈពេល​១៥​ថ្ងៃ ចាប់ពី​ថ្ងៃទី​១-១៥ ជា​រៀងរាល់ខែ​។

ពលរដ្ឋ​ត្រូវតែ​បង់ថ្លៃ​សំរាម​តាម​ប្រព័ន្ធ​អេឡិចត្រូនិក តាម​ធនាគារ​អេស៊ីលីដា និង​តាម​ភ្នាក់ងារ​វេរ​លុយ​ដែលមាន​ដូចជា Wing, AMK, True money, Dara Pay, PiPay, EMoney និង​លី​ហួរ​វេរ​លុយជាដើម​។ បើតាមសាលារាជធានីភ្នំពេញ រដ្ឋាភិបាល​បានអនុញ្ញាត​ឲ្យ​ក្រុមហ៊ុន​ស៊ិន​ទ្រី ​ប្រមូល​សំរាម​នៅតាម​គេហដ្ឋាន ឬ​តាម​ស្ថាប័ន​នានា ប៉ុន្តែ​មិនមាន​សិទ្ធិ​ប្រមូល​ថ្លៃ​សេវា​សំរាម​ឡើយ​៕

ផ្ដល់សិទ្ធិដោយ៖ khmernas

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post