លោក វ៉ូ ក្វាងមិញ ឯកអគ្គរដ្ឋទូតវៀតណាមប្រចាំកម្ពុជាលើកឡើងថា ភាគីប្រទេសវៀតណាម មិនទាន់សន្និដ្ឋានថាបុរសដែលផ្ទុកជំងឺ កូវីដ១៩ ឆ្លងចេញពីកម្ពុជានៅឡើយទេ ក្រោយពេលមានសារព័ត៌មានវៀតណាមមួយចំនួនចុះផ្សាយថា បុរជនជាតិវៀតណាមម្នាក់រស់នៅក្នុងខេត្តតាញិញ តេស្តឃើញមេរោគកូវីដ ១៩ បន្ទាប់ពីបានធ្វើដំណើរចេញពីខេត្តសៀម ចូលទឹកដីវៀតណាមវិញ។
លោកវ៉ូ ក្វាងមិញ បញ្ជាក់នៅថ្ងៃទី ២០ ខែ ឧសភាថា ភាគីវៀតណាមមិនបានបញ្ជាក់ថាបុរសផ្ទុកជំងឺកូវីដ ១៩ មានការឆ្លងពីប្រទេសកម្ពុជានោះទេ។ ប៉ុន្តែតាមគោលការណ៍បង្ការនិងប្រឆាំងជំងឺឆ្លង វៀតណាមត្រូវអនុវត្តការដាក់ឲ្យនៅដាច់ដោយឡែកគ្រប់ករណីដែលមានការសង្ស័យនិងត្រូវប្រកាសជាសាធារណៈនូវព័ត៌មានមួយចំនួនទាក់ទងនឹងអ្នកជំងឺដូចជាការធ្វើដំណើររបស់អ្នកជំងឺនេះដើម្បីអ្នកដែលធ្លាប់មានការប៉ះពាល់អោយមានការប្រុងប្រយ័ត្ននិងរាយការណ៍ដល់ស្ថាប័នជំនាញរបស់វៀតណាម។
ទន្ទឹមគ្នានេះលោកស្រី ឱ វណ្ណឌីន អ្នកនាំពាក្យក្រសួងសុខាភិបាលកម្ពុជាក៏បានច្រានចោល ចំពោះការចុះផ្សាយរបស់សារព័ត៌មានវៀតណាមគឺជាព័ត៌មានមិនជាក់លាក់។
លោកស្រី ឱ វណ្ណឌីន បន្ថែមថា៖«ក្រសួងសុខាភិបាលកម្ពុជាបានចាត់ទុកថា ការចុះផ្សាយរបស់សារព័ត៌មាន ថាបានធ្វើឱ្យប៉ះពាល់ធ្ងន់ធ្ងរអំពីកិច្ចប្រឹងប្រែងរបស់កម្ពុជាក្នុងការបង្ការជំងឺកូវីដ១៩។
លោក ក្វាងមិញឲ្យដឹងទៀតថា ក្រសួងសុខាភិបាលវៀតណាមបានសហការយ៉ាងស្អិតរមួត ហើយតែងតែមានការផ្លាស់ប្តូរព័ត៌មានជាមួយក្រសួងសុខាភិបាលកម្ពុជានិងបណ្តាប្រទេសដទៃក្នុងគោលបំណងរួមគឺខិតខំបង្ការនិងប្រឆាំងនឹងជំងឺឆ្លងនេះ។
បច្ចុប្បន្ន កម្ពុជាបានព្យាបាលអ្នកជំងឺកូវីដ១៩ ជាសះស្បើយ១០០% ខណៈជាង១ ខែមកនេះពុំមានអ្នកឆ្លងថ្មីឡើយ។ ចំណែកប្រទេស វៀតណាមមានអ្នកឆ្លងជំងឺកូវីដ១៩ មានចំនួន ៣២៤នាក់ ជាសះស្បើយ ២៥៣នាក់ ស្លាប់គ្មាន៕
ផ្ដល់សិទ្ធិដោយ៖ khmernas