ក្រសួងការបរទេសនិងសហប្រតិបត្តិការអន្តរជាតិកម្ពុជា បានចេញផ្សាយព័ត៌មានមួយនៅថ្ងៃទី១២មិថុនានេះថា រដ្ឋាភិបាលជប៉ុនបានសម្រេចផ្ដល់ជំនួយសង្គ្រោះបន្ទាន់ ដែលជាគ្រឿងបរិក្ខាវេជ្ជសាស្រ្ដ និងជំនួយបច្ចេកទេស គិតជាទឹកប្រាក់ជាង៦លាន៣សែនដុល្លារដល់កម្ពុជា ដើម្បីប្រើប្រាស់ក្នុងការទប់ស្កាត់ការរាលដាលជំងឺកូវីដ១៩នៅកម្ពុជា។ក្រសួងការបរទេសបញ្ជាក់ថា ចំពោះសមានចិត្តរបស់រដ្ឋាភិបាលជប៉ុននេះ រដ្ឋាភិបាលកម្ពុជាប្ដេជ្ញាប្រើប្រាស់ជំនួយសង្គ្រោះបន្ទាន់ទាំងនោះ ឱ្យមានប្រសិទ្ធភាព ដើម្បីដោះស្រាយគ្រោះមហន្តរាយសុខភាពជាសកលបណ្ដាលមកពីជំងឺកូវីដ១៩ និងដើម្បីស្ដារឡើងវិញចំពោះផលប៉ះពាល់ទាំងឡាយ ផ្នែកសេដ្ឋកិច្ចនិងសង្គម ព្រមទាំងធានានូវសុខុមាលភាពប្រជាជនកម្ពុជា៕ ផ្ដល់សិទ្ធិដោយ khmernas