សង្គម
អាម៉ាប៉ាប៉ាញ៉ូសប្រិយមិត្តប្រហែលជាបានជ្រាបហើយ កាលពីពេលថ្មីៗកន្លងទៅនេះ ទាក់ទងនឹង លោក ខៀវ ណាវី រស់នៅខេត្តកំពង់ចាម ដែលបានកែច្នៃរថយន្តរបស់លោក ពីធុងសាំង ដោយដៃសុទ្ធសាធ និងអាចជិះបាន២នាក់ យ៉ាងណានៅមិនទាន់អស់ទេ ក្រឡេកមកមើល បុរសម្នាក់នៅខេត្ត ស្ទឹងត្រែងនេះវិញ ក៏មានគំនិតកែច្នៃម៉ូតូមួយគ្រឿង ទៅជារថយន្តដែលមានកង់ ៤ អាចដឹកមនុស្សបានរហូតដល់ ៥ នាក់។
លោកឌិន មណ្ឌល អតីតមេប៉ុស្តិ៍រដ្ឋបាលឃុំស្រែឫស្សីស្រុកថាឡាបរិវ៉ាត់ ខេត្តស្ទឹងត្រែង បានរៀបរាប់ប្រាប់ឱ្យដឹងថា ដោយមើលឃើញការជិះម៉ូតូងាយនឹងគ្រោះថ្នាក់ ហើយបានគ្នាតិចទើបលោកមានគំនិតច្នៃប្រឌិត ដោយស្នាដៃខ្លួនឯង ទិញម៉ូតូមួយគ្រឿង ទៅជារថយន្តតូចច្រឡឹង។
លោកមណ្ឌល រៀបរាប់ប្រាប់សារព័ត៌មានក្នុងស្រុកមួយនៅថ្ងៃទី១៦ ខែមិថុនា ឆ្នាំ២០២០ ថា គាត់បានទិញម៉ូតូមួយគ្រឿងតម្លៃប្រហែល 800 ដុល្លារ ជាប្រភេទម៉ូតូចាស់ រួចដោះយកម៉ាស៊ីនម៉ូតូ ម៉ាកយ៉ាមាហា ទៅកែច្នៃមកជារថយន្តធុនតូចមួយគ្រឿង ដ៏ស្រស់ស្អាត។
លោកបានបន្ថែមទៀតថា ចំណុចពិសេសនៃម៉ូតូ គឺគាត់បានដោះយកម៉ាស៊ីន និងកន្លែងសំខាន់ៗមួយចំនួន ទៅបំពាក់តខ្សែភ្លើង។ រួចទិញបន្ទះដែកថែបកែច្នៃទៅជារូបរាងកូនរថយន្ត។
បន្ថែមពីនេះ យកគ្រឿងរថយន្តចាស់ៗ និងគ្រឿងម៉ូតូមួយចំនួនមកកែច្នៃ ហើយចំពោះហ្វ្រាំងភ្ជាប់ដូចហ្វ្រាំងរថយន្តធម្មតា អាចយកជើងជាន់បាន។
នៅផ្នែកខាងក្រោយ គាត់យកធុងបាសដាក់អាចច្រៀង បានដោយភ្ជាប់នឹងទូរស័ព្ទដៃ ហើយមនុស្សក៏អាចអង្គុយលើធុងបាសនោះក៏បានដែរ ថែមទាំងមានកែច្នៃដំបូល ដើម្បីកុំឱ្យត្រូវកម្ដៅថ្ងៃ និងទឹកភ្លៀង។
បុរសវ័យ៥២ឆ្នាំបានប្រាប់ឲ្យដឹងទៀតថា គាត់មានគំនិតច្នៃប្រឌិត ដោយសារតែគាត់និងប្រពន្ធ មានវ័យចំណាស់ទៅហើយ ហើយជិះម៉ូតូមានគ្នាតិច។ ពេលគាត់ទិញម៉ូតូច្នៃទៅជារថយន្ត អាចជិះបានមនុស្សច្រើន និងងាយស្រួលជិះទៅលេងបងប្អូន ឬមិត្តភក្តិនៅក្នុងស្រុកក្នុងខេត្តបាន។
យ៉ាងណាមិញ គាត់គ្មានលទ្ធភាពទិញរថយន្ត ដែលមានតម្លៃជិះដូចគេបាន គឺមានតែកែច្នៃម៉ូតូទៅជាកូនរថយន្តតូចមួយ។
ម្យ៉ាងទៀត គាត់ចង់បញ្ចេញសមត្ថភាពគំនិតច្នៃប្រឌិត ដោយខ្លួនឯងផងដែរ។ គំនិតដែលគាត់ផ្តើមនឹកឃើញកែច្នៃនេះ ក៏ដោយសារតែគាត់ចេះមើលរបៀបច្នៃតាម youtube។
គ្រាន់តែទិញម៉ូតូរួមទាំងសម្ភារ ដែលមានតម្លៃត្រឹមតែជាង ១ ពាន់ដុល្លារ អាចច្នៃទៅជារថយន្តបាន។ ឃើញបែបនេះ ភរិយាបានកោតសរសើរ ពីគំនិតកែច្នៃរបស់ប្តីគាត់។ ហើយក៏មិនបានហាមឃាត់ពីគំនិតរបស់ប្ដីឡើយ៕