ការផ្ទុះឡើងជំងឺកូវីដ១៩នៅទីក្រុងប៉េកាំង បានចាប់ផ្ដើមរាលដាលដល់ខេត្តក្បែរខាងមួយទៀតដែលស្ថិតនៅខាងជើងឆៀងខាងកើត គឺខេត្តLiaoning ខណៈអាជ្ញាធរសុខាភិបាលខេត្តនេះបាននិយាយថា មានអ្នកឆ្លងថ្មីចំនួនពីរករណីត្រូវបានគេរាយការណ៍នៅថ្ងៃអាទិត្យ គឺជាអ្នកដែលមានទំនាក់ទំនងជិតស្និទ្ធជាមួយអ្នកឆ្លងជំងឺកូវីដ១៩នៅក្នុងទីក្រុងប៉េកាំង។
យ៉ាងហោចណាស់មានទីក្រុងចំនួន១០នៅចិន បានណែនាំឱ្យប្រជាជន មិនឱ្យធ្វើដំណើរទៅកាន់ទីក្រុងប៉េកាំង ឬរាយការណ៍ទៅអាជ្ញាធរ ប្រសិនបើពួកគេទើបបានធ្វើដំណើរទៅរដ្ឋធានីមួយនេះកាលពីពេលថ្មីៗនេះ។
គិតត្រឹមម៉ោង៣រសៀល នៅថ្ងៃអាទិត្យទី១៤មិថុនានេះ ខណ្ឌចំនួន១០នៅទីក្រុងប៉េកាំង បានបង្កើនកម្រិតហានិភ័យនៃការឆ្លងជំងឺកូវីដ១៩ពីកម្រិតទាបទៅមធ្យម ខណៈចិនកំពុងព្រួយបារម្ភអំពីការកើតឡើងរលកទីពីរនៃការឆ្លងជំងឺកូវីដ១៩ ក្រោយពីខ្លួន ទើបតែបានបន្ធូរបន្ថយការជាប់គាំងនៅក្នុងប្រទេស ដែលបានធ្វើឱ្យប៉ះពាល់សេដ្ឋកិច្ចកាលពីដើមឆ្នាំនេះ។
បន្ទាប់ពីអស់ប៉ុន្មានសប្តាហ៍ដែលស្ទើរតែមិនមានការឆ្លងមេរោគថ្មីនៅក្នុងប្រទេសចិន ប៉ុន្តែកាលពីប៉ុន្មានថ្ងៃថ្មីៗនេះ រដ្ឋធានីប៉េកាំងបានប្រកាសករណីឆ្លងថ្មីលើប្រជាជនរាប់សិបនាក់ ដែលជាប់ទាក់ទងទៅនឹងទីផ្សារលក់បោះដុំអាហារធំមួយគឺផ្សារXinfadi ដែលធ្វើឱ្យមានការព្រួយបារម្ភអំពីការកើតឡើងនៃជំងឺនេះជាថ្មី។
សម្រាប់នៅទីក្រុងប៉េកាំង គឺអស់រយៈពេលជិតពីរខែមកនេះ គ្មានករណីឆ្លងថ្មីឡើយ ប៉ុន្តែចាប់តាំងពីមានការឆ្លងជាលើកដំបូងឡើងវិញ ដែលជាប់ពាក់ព័ន្ធនឹងផ្សារលក់បន្លែនេះនៅថ្ងៃទី១២មិថុនា គឺមកដល់ពេលនេះ អ្នកឆ្លងបានកើនឡើងដល់៥១នាក់ ក្នុងនោះមាន៨នាក់ត្រូវបានរាយការណ៍នៅរយៈពេល៧ម៉ោងនៅថ្ងៃអាទិត្យ។
មន្រ្តីជំនាញរបស់ចិនបានប្រាប់កាសែត Health Times នៅថ្ងៃអាទិត្យថា ទីក្រុងប៉េកាំងនឹងមិនក្លាយជាទីក្រុងវ៉ូហានទី២ ដែលវីរុសឆ្លងកូវីដ១៩ អាចរាលដាលទៅកាន់ទីក្រុងជាច្រើននៅទូទាំងប្រទេស ហើយត្រូវការបិទប្រទេសម្ដងទៀតឡើយ។
លោកZeng Guang អតីតប្រធានផ្នែករោគរាតត្បាតនៅមជ្ឈមណ្ឌលសម្រាប់ការត្រួតពិនិត្យនិងការពារជំងឺ និងបច្ចុប្បន្នជាអ្នកជំនាញជាន់ខ្ពស់នៃគណៈកម្មការសុខភាពជាតិរបស់ប្រទេសចិនបាននិយាយថា ការផ្ទុះឡើងនៅក្នុងទីក្រុងប៉េកាំងនៅពេលនេះ ទំនងជានឹងត្រូវបានគ្រប់គ្រងបាន បន្ទាប់ពីការកើនឡើងអ្នកឆ្លងក្នុងរយៈពីរបីថ្ងៃមកនេះ៕
ប្រភព៖BBC
ផ្ដល់សិទ្ធិដោយ៖ khmernas