មន្រ្តីជំនាញរបស់ក្រសួងពាណិជ្ជកម្ម បានរកឃើញបន្លែ៦មុខ រួមមានស្ពៃបូកគោ ផ្កាខាត់ណា ពោតបារាំង ក្រូចឆ្មាតូច ផ្កាគូឆាយ និងផ្លែល្ពៅ មានផ្ទុកសំណល់ថ្នាំសម្លាប់សត្វល្អិត កាលពីថ្ងៃទី១២ខែមិថុនា។
ការរកឃើញនេះ នៅក្នុងពេលចុះត្រួតពិនិត្យការនាំចូលបន្លែ ដែលមានសារធាតុគីមីពុលពីប្រទេសវៀតណាមចូលមកព្រះរាជាណាចក្រកម្ពុជា ដែលនាំចូលតាមមាត់ច្រកទ្វារអន្តរជាតិជ្រៃធំ ស្រុកកោះធំ ខេត្តកណ្តាល។
ជាមួយគ្នានេះ កាលពីថ្ងៃសៅរ៍ ទី១៣ ខែមិថុនា មន្រ្តីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(CCF) នៃក្រសួងពាណិជ្ជកម្មប្រចាំ នៅខេត្តឧត្តរមានជ័យ ក៏បាននាំយករថយន្តមន្ទីរពិសោធន៍ចល័តផ្នែកម្ហូបអាហារ ចុះ ត្រួតពិនិត្យផលិតផលទំនិញ និងម្ហូបអាហារ នៅក្នុងផ្សារផ្សារសំរោង ដែលមានទីតាំងនៅភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ។
នៅក្នុងការពិនិត្យរកទំនិញខូចគុណភាពនិងមានសារធាតុគីមីហាមឃាត់ ដែលធ្វើឱ្យប៉ះពាល់ដល់សុខភាពប្រជាពលរដ្ឋនោះ មន្ត្រីជំនាញបានធ្វើវិភាគបឋមទៅលើគំរូម្ហូបអាហារចំនួន១៤គំរូ មានដូចជា ឆៃថាវ ស្ពៃក្ដោប ស្ពៃបូកគោ ត្រសក់ស្រូវ ម្ទេសប្លោក ផ្លែសារី ផ្លែប៉ោម ផ្លែប៉ោមខៀវ ជ្រក់មមាញ ស្ពៃជ្រក់ ជ្រក់ទំពាំង សណ្ដែកបណ្តុះ ដើម្បីស្វែងរកសារធាតុគីមីហាមឃាត់ ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ។
ប៉ុន្តែជាលទ្ធផល មន្ត្រីជំនាញបានរកឃើញ ផលិតផល ផ្លែប៉ោមក្រហម និងផ្លែប៉ោមខៀវ ដែលសង្ស័យថាមានផ្ទុកសារធាតុថ្នាំសំលាប់សត្វល្អិត។
បន្ទាប់ពីត្រួតពិនិត្យរួចរាល់មន្ត្រីបានធ្វើកំណត់ហេតុដកហូត និងបានឱ្យតំណាងម្ចាស់ម្ហូបអាហារ និងទំនិញ ធ្វើកិច្ចសន្យាបញ្ឈប់ការដាក់តាំងលក់ទំនិញដែលមានផ្ទុកសារធាតុគីមីហាមឃាត់បន្តទៀត៕
ផ្ដល់សិទ្ធិដោយ៖ khmernas