សង្គម
អាម៉ាប៉ាប៉ាញ៉ូសរាជធានីភ្នំពេញ ៖ នៅរសៀលថ្ងៃទី៣០ ខែមិថុនា ឆ្នាំ២០២០ នេះ លោក ផែង វណ្ណៈ បានចូលខ្លួនទៅកាន់សាលាដំបូងរាជធានីភ្នំពេញដើម្បីធ្វើការបំភ្លឺជុំវិញបណ្ដឹងរបស់លោកជំទាវ ឡោក ខេង ដែលជាតំណាងរាស្ត្រមណ្ឌលភ្នំពេញ ។
ហើយនៅមុននេះបន្តិច ល្ងាចថ្ងៃដដែលនេះ តាមប្រភពផេគផ្លូវការរបស់លោក ដដែលបង្ហោះទទួលស្គាល់កំហុស និងធ្វើការសុំទោសលោក ជំទាវ ឡោក ខេង នៅថ្ងៃស្អែក។
នេះជាសារទាំងស្រុងរបស់លោក ៖ «ខ្ញុំបានបំភ្លឺជូនតំណាងអយ្យការអមសាលាដំបូងរាជធានីភ្នំពេញរួចហើយ ។ បន្ទាប់ពីបានឃើញពាក្យបណ្តឹងរបស់លោកជំទាវ ឡោក ខេង ទើបខ្ញុំដឹងថា មានពាក្យសំដីខ្ញុំខ្លះនិយាយលើសដែលនាំអោយប៉ះពាល់ដល់កិត្តិយសលោកជំទាវ ។ ខ្ញុំនឹងធ្វើលិខិតសុំទោសលោកជំទាវ ជាសាធារណៈ នៅថ្ងៃស្អែកចំពោះកំហុសឆ្គងខ្លះរបស់ខ្ញុំ ។ សូមអរគុណបងប្អូនទាំងអស់គ្នា ដែលបារម្ភពីខ្ញុំ ខ្ញុំមិនអីទេ» ។
សូមជម្រាបជូនថាកាលពីថ្ងៃទី០១ ខែមិថុនា ឆ្នាំ២០២០ លោក អ៊ុ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅលោក ផែង វណ្ណៈ ឲ្យចូលបំភ្លឺនៅវេលាម៉ោង២ និង៣០នាទី រសៀលថ្ងៃទី៣០ ខែមិថុនា ឆ្នាំ២០២០ នេះ ដើម្បីសាកសួរពីដំណើររឿង «បណ្តឹងរបស់លោកស្រី ឡោក ខេង ចុះថ្ងៃទី២១ ខែមេសា ឆ្នាំ២០២០ ដែលប្តឹងលោកពីបទ ញុះញង់ឲ្យមានការរើសអើង , បរិហារកេរ្តិ៍ជាសាធារណៈ និងបទ ជេរប្រមាថជាសាធារណៈ» ។
ហើយការសម្រេចប្តឹងនេះរបស់លោកជំទាវ ឡោក ខេង ក្រោយពេលលោក ផែង វណ្ណៈ បានផ្សាយព័ត៌មាន អំពីក្រុមលួចលក់ដីប្រពលរដ្ឋទំហំជាង២ហិកតា នៅភូមិសំរោងខាងត្បូង សង្កាត់សំរោង ខណ្ឌព្រែកព្នៅ ។ មេខ្លោងលួចលក់ដីឈ្មោះឡុង ដារា ត្រូវបានសមត្ថកិច្ចចាប់ខ្លួនបញ្ជូនទៅអយ្យការអមសាលាដំបូងរាជធានី ចាត់ការតាមផ្លូវច្បាប់ និងត្រូវបានចៅក្រមចេញដីកាឃុំខ្លួនដាក់ពន្ធនាគាររួចហើយ ៕