
សង្គម
អាម៉ាប៉ាប៉ាញ៉ូសនៅថ្ងៃព្រហស្បតិ៍ ទី៦ ខែសីហានេះ លោក ឃួង ស្រេង អភិបាលរាជធានីភ្នំពេញ បានបញ្ជារឲ្យមន្រ្តីជំនាញខណ្ឌទាំង១៤ នៅភ្នំពេញលុបបំបាត់កន្លែងលក់ហ្គាស ឬបញ្ចូលហ្គាស គ្មានបច្ចេកទេស និងអនាធិបតេយ្យ។
លោក ឃួង ស្រេង ព្រមានថា៖«ភ្នំពេញមានកន្លែងលក់ហ្គាស និងបញ្ជូលហ្គាស គ្មានស្តង់ដារបច្ចេកទេសជាច្រើនកន្លែង ដូច្នេះអាជីវករលក់ហ្គាសទំាងអស់ត្រូវបញ្ឈប់ការទិញធុងហ្គាសចាស់ៗយកមកបាញ់ថ្នំាដើម្បីប្រើប្រាស់បន្ត ដែលបង្ករហានិភ័យគ្រោះថ្នាក់ផ្ទុះធុងហ្គាស និងអគ្គិភ័យឆាប់ឆេះផ្ទះជាដើម»។
ការព្រមាននេះ ធ្វើឡើងបន្ទាប់ពីមានការផ្ទុះហ្គាសមួយកន្លែង បានធ្វើឲ្យមនុស្ស៤ នាក់ស្លាប់ នៅបណ្ដាយផ្លូវត្រសក់ផ្អែម សង្កាត់បឹងរាំង ខណ្ឌដូនពេញ កាលពីខែកក្កដាកន្លងទៅ។
លោក បន្តថា កិច្ចការងារនេះគឺជាសន្តិសុខសុវត្ថិភាពពលរដ្ឋនៅមូលដ្ឋាន។ កាលណាកន្លែងលក់ហ្គាសអានាធិបតេយ្យមានកាន់តែច្រើន ហានិភ័យកាន់តែខ្ពស់។
ជាមួយគ្នានេះ លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ បានប្រាប់ថា បញ្ហាហ្គាសឬការលក់សំាងដបនៅតាមចិញ្ចើមផ្លូវឬផ្ទះលក់ដូរគ្រឿងទេសជាបញ្ហាប្រឈមផ្នែកសុវត្ថិភាព ហើយត្រូវបង្កើនការយកចិត្តទុកដាក់ លុបបំបាត់ឲ្យខាងតែបាន ខណៈដែលអគ្គិភ័យនានាដែលកើតឡើងនៅរាជ ធានីភ្នំពេញកន្លងមកនេះភាគច្រើនបណ្តាលមកពីការផ្ទុះធុងហ្គាសដែលគ្មានបច្ចេកទេស៕