បរិស្ថាន
អាម៉ាប៉ាប៉ាញ៉ូសក្រុមអ្នកស្រាវជ្រាវបានប្រទះឃើញសត្វរមាំងដែលជិតពូជពីប្រទេសកម្ពុជាជាលើកដំបូងក្នុងអំឡុងពេល ៥ឆ្នាំចុងក្រោយនេះ នៅដែនជម្រកសត្វព្រៃសំបូរខេត្តក្រចេះ ខណៈសត្វនេះកំពុងស្ថិតក្នុងបញ្ជីក្រហមរបស់អង្គការ IUCN។
សេចក្ដីប្រកាសព័ត៌មានរបស់អង្គការ WWF កាលពីថ្ងៃទី ២៤ ខែកញ្ញាបញ្ជាក់ថា សត្វរមាំងទាំង៤ក្បាលត្រូវបានប្រទះឃើញតាមរយៈការប្រើម៉ាស៊ីនថតស្វ័យប្រវត្ត ក្នុងនោះមានរមាំងញីពេញវ័យចំនួន៣ ក្បាល និងជំទង់មួយក្បាលដែលកំពុងរស់នៅតំបន់ការពារធម្មជាតិព្រៃសំបូរខេត្តក្រចេះ។
លោក សេង នៀក នាយកអង្គការ WWF-កម្ពុជា បានលើកឡើងថា ការប្រទះឃើញសត្វរមាំងទាំងនេះ ជាភស្តុតាងបញ្ជាក់ពីប្រសិទ្ធភាព និងផលនៃកិច្ចការគ្រប់គ្រងនិងអភិរក្សតំបន់ការពារ ហើយបានផ្ដល់ក្ដីសង្ឃឹមក្នុងការការពារប្រភេទសត្វនេះក្នុងប្រទេសកម្ពុជានិងក្នុងតំបន់។
តាមការប៉ានស្មានចេញផ្សាយដោយអង្គការ IUCN ក្នុងឆ្នាំ ២០១៨ ចំនួនសត្វរមាំង នៅលើសកលលោកមានចំនួនតិចជាង៧០០ក្បាល ហើយវត្តមានសត្វរមាំងនៅសេចសល់តិចតួចប៉ុណ្ណោះដែលកំពុងរស់នៅក្នុងតំបន់ព្រៃការពារនានានៅប្រទេសកម្ពុជា។
តាមរយៈការស្រាវជ្រាវជីវចម្រុះឆ្នាំ ២០០៦-២០០៧ ដែនជម្រកសត្វព្រៃសំបូរ និងដែនជម្រកសត្វព្រៃប្រសព្វ ត្រូវបានអ្នកវិទ្យាស្រ្តកត់ត្រាវត្តមានក្រុមថនិកសត្វមាឌធំចំនួន ១១ប្រភេទ ឧរុង្គសត្វ និងល្មូន ចំនួន ៥៦ប្រភេទ រុក្ខជាតិជិត៧០០ប្រភេទ បក្សី ២១៥ប្រភេទ និងត្រី ចំនួន ២២៣ ប្រភេទ។ លើសពីនេះ ប្រព័ន្ធទន្លេនិងព្រៃឈើនៅក្នុងតំបន់នេះ ជាប្រភពចំណីអាហារ និងសម្រាប់បង្កើតឱកាសទាញយកប្រាក់ចំណូលដ៏សំខាន់សម្រាប់សហគមន៍មូលដ្ឋាន៕
