សង្គម
អាម៉ាប៉ាប៉ាញ៉ូសភ្នំពេញ ៖ មុននេះបន្តិច យប់ថ្ងៃទី ២១ ខែតុលា ឆ្នាំ២០២០នេះ បើយោងតាមផេគផ្លូវការរបស់ក្រសួងមហាផ្ទៃ បានសេចក្តីបំភ្លឺ ករណីលោកឧត្តមសេនីយ៍ទោ រស់ ឧស្សាហ៍។
អគ្គាធិការដ្ឋាន ក្រសួងមហាផ្ទៃ មានកិត្តិយសសូមជម្រាបជូនដល់សាធារណជន មេត្តាជ្រាបថា: កន្លងមក ក៏ដូចបច្ចុប្បន្ននេះ មានអ្នកបានលើកឡើងនូវមន្ទិលសង្ស័យ និងបានសាកសួរមកកាន់អគ្គាធិការដ្ឋាន ក្រសួងមហាផ្ទៃ ករណីលោកឧត្តមសេនីយ៍ទោ រស់ ឧស្សាហ៍ អត្តលេខ៦៥៨៨៨ ថាតើបច្ចុប្បន្នកំពុងកាន់មុខតំណែងជាអគ្គាធិការរង នៃអគ្គាធិការដ្ឋាន ក្រសួងមហាផ្ទៃ ពិតមែនឬទេ?
ដើម្បីឆ្លើយបំភ្លឺទៅនឹងមន្ទិលសង្ស័យខាងលើពាក់ព័ន្ធករណីលោកឧត្តមសេនីយ៍ទោ រស់ ឧស្សាហ៍ នេះ អគ្គាធិការដ្ឋាន ក្រសួងមហាផ្ទៃ សូមគូសបញ្ជាក់ដល់សាធារណជនមេត្តាជ្រាបថា បច្ចុប្បន្ននេះ លោកឧត្តមសេនីយ៍ទោ រស់ ឧស្សាហ៍ មិនមែនជាអគ្គាធិការរង នៃអគ្គាធិការដ្ឋាន ក្រសួងមហាផ្ទៃនោះទេ ដោយលោកឧត្តមសេនីយ៍ទោ រស់ ឧស្សាហ៍ ត្រូវបានបញ្ចប់មុខតំណែងពីអគ្គាធិការរង នៃអគ្គាធិការដ្ឋាន ក្រសួងមហាផ្ទៃ តាំងពីថ្ងៃទី១៧ ខែវិច្ឆិកា ឆ្នាំ២០១៦ នេះបើយោងតាមអនុក្រឹត្យលេខ១១៣១.អនក្រ.តត ស្តីពីការបញ្ចប់មុខតំណែងនាយនគរបាលជាតិ។
អាស្រ័យហេតុនេះ សូមសាធារណជនជ្រាបជាព័ត៌មាន ក៏ដូចបំភ្លឺជូនអ្នកដែលមានមន្ទិលសង្ស័យ និងបានសាកសួរករណីនេះមកកាន់អគ្គាធិការដ្ឋាន ក្រសួងមហាផៃ្ទ កន្លងមក៕
ប្រភព៖ អគ្គាធិការដ្ឋាន
