សង្គម
អាម៉ាប៉ាប៉ាញ៉ូសបើតាមភ្នាក់ងារ MTI បានឲ្យដឹងថា លោក Peter Szijjarto រដ្ឋមន្ត្រីការបរទេសរបស់ប្រទេសហុងគ្រី ត្រូវបានគេរាយការណ៍ថាមានវិជ្ជមានកូវីដ១៩ នៅពេលដែលលោកបានទៅដល់ប្រទេសថៃ។
ក្រោយពីការរកឃើញវិជ្ជមាននៃកូវីដ១៩នេះ ធ្វើឲ្យជំនួបរវាងលោក និងនាយករដ្ឋមន្ត្រីថៃត្រូវលុបចោលភ្លាមៗផងដែរ។
បើតាមប្រភពបានបញ្ជាក់ទៀតថា លោក Szijjarto នេះមានវិជ្ជមានកូវីដ១៩ ប៉ុន្តែមិនមានចេញរោគសញ្ញាអ្វីនោះទេ។
កាលពីថ្ងៃទី៣ ខែវិច្ឆិកា ឆ្នាំ២០២០ ម្សិលមិញនេះ លោក Szijjarto ក៏បានមកទស្សនកិច្ចនៅកម្ពុជាផងដែរ និងបានជួបជាមួយ សម្តេចតេជោ ហ៊ុន សែន នាយករដ្ឋមន្ត្រីកម្ពុជា រួមទាំង មន្ត្រីជាន់ខ្ពស់រាជរដ្ឋាភិបាលកម្ពុជាជាច្រើនរូបទៀត ដោយខាងភាគីកម្ពុជា និងរដ្ឋមន្ត្រីការបរទេសហុងគ្រី ក៏បានចុះហត្ថលេខារួមគ្នាលើកិច្ចព្រមព្រៀងចំនួន៣ផងដែរ។ កិច្ចព្រមព្រៀង និងអនុស្សារណៈ ដែលនឹងត្រូវចុះហត្ថលេខានោះរួមមាន៖
១- កិច្ចព្រមព្រៀងស្តីពីសេវាដឹកជញ្ជូនតាមផ្លូវអាកាសចរ រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលហុងគ្រី។
២- អនុស្សរណៈនៃការយោគយល់គ្នាស្តីពីការគ្រប់គ្រងធនធានទឹក រវាងក្រសួងធនធានទឹក និងឧតុនិយមនៃព្រះរាជាណាចក្រកម្ពុជា និងក្រសួងមហាផ្ទៃហុងគ្រី។
៣- អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម រវាងក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា និងក្រសួងកសិកម្មហុងគ្រី៕
បន្ទាប់ពីទទួលបានព័ត៌មានខាងលើនេះ អ្នកនាំពាក្យក្រសួងការបរទេសកម្ពុជា លោកកុយ គួង ថ្លែងប្រាប់អ្នកកាសែតថា លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ បានអញ្ជើញក្រុមគ្រូពេទ្យជំនាញ ដើម្បីធ្វើតេស្តដល់មន្ត្រីទាំងអស់ដែលធ្វើការពាក់ព័ន្ធជាមួយ លោក Péter Szijjártó រដ្ឋមន្រ្តីការបរទេសនិងពាណិជ្ជកម្មហុងគ្រី។