សង្គម
ភ្នំពេញ៖ ចេះតែឆ្ងល់ហេតុអ្វីបានជាចេះតែបាត់មាន់ បាត់ទា ជាញឹកញាប់ តែមិនដឹងអ្នកណាជាអ្នកយកតាមមិនដែលទាន់ នេះជារឿងរ៉ាវរបស់ប្រជាពលរដ្ឋ រស់នៅក្នុងភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញថ្លែងប្រាប់អ្នកសារព័ត៌មាន។
តែរឿងទាំងនេះបានស្រាយចម្ងល់ចេញហើយដោយនៅព្រឹកម៉ោង៦ និង៣០នាទីព្រឹក ថ្ងៃទី០៨ ខែធ្នូ ឆ្នាំ២០២១នេះ ក្រោយពេលពលរដ្ឋបានឮសំឡេង សត្វមាន់ សត្វទារបស់ខ្លួនស្រែក ក៏នាំគ្នាចេញទៅរកមើល ដោយភ្ញាក់ផ្អើលក្រោយប្រទះឃើញសត្វពស់ថ្លាន់មួយក្បាល ដែលនៅក្នុងទ្រុងកំពុងតែលេបទា។
យ៉ាងណាភ្លាមៗក្រោយពេលឃើញហេតុការណ៍នេះ ពលដ្ឋបាននាំគ្នាមកចាប់យកចេញតែម្ដង ដោយរង់ចាំប្រគល់ជូនអង្គការអភិរក្សសត្វព្រៃ យកទៅព្រលែងក្នុងព្រៃធម្មជាតិ ឬកន្លែងប្រមូលផ្តុំរក្សាទុក ។ នេះបើតាមម្ចាស់ផ្ទះឈ្មោះ នូ ប៊ុណ្ណា ភេទប្រុស អាយុ៥៣ឆ្នាំ រស់នៅផ្ទះ ចំណុចខាងលើថ្លែងប្រាប់អ្នកសារព័ត៌មានត្រយង។
