សង្គម
រូបភាពប៉ុន្មានសន្លឹករបស់កំលោះយុវជនជាជនជាតិខ្មែរម្នាក់ មានតួនាទីជាមេបញ្ជាការកងអនុសេនាធំ និងទើបតែបញ្ចប់ថ្នាក់បណ្ឌិតសភាយោធាអាមេរិក បានធ្វើឱ្យអ្នកលេងបណ្ដាញសង្គមមានការរំភើបស្ទើរតែស្រក់ទាំងភ្នែក ដោយសារតែប្រវត្តិ និងការតស៊ូរៀនសូត្ររហូតមានឱកាស មានតួនាទីនៅលើទឹកដីអាមេរិចនេះ តែអ្វីដែលរឹតតែគោរពទៀតនោះគឺសម្ដីរបស់លោកយាយដែលជាអ្នកមានគុណថា៖ «ទោះទៅដល់ទីណា សូមចៅកុំភ្លេចកំណើតរបស់ខ្លួនដែលធ្លាប់ជាក្មេងឃ្វាលគោឱ្យសោះ»
តាមរយៈសំណេររបស់លោក ពេជ្រ មូន បានឱ្យដឹងថា៖ «អានុស្សាវរីយ៍នៃជីវិត ១០ ឆ្នាំហើយដែលលោកយាយរក្សាទុកក្រម៉ា និងខ្សែគោដែលខ្ញុំប្រើ ហើយរង់ចាំខ្ញុំត្រលប់ទៅស្រុកវិញ។ ខ្ញុំតែងប្រើវាសម្រាប់ជាថ្នក់ដាក់ បាយ ទឹក និងសៀវភៅនៅពេលទៅឃ្វាលគោពេលរស់នៅឯស្រុកកំណើត។ ភាគច្រើន នៅក្នុងថ្នក់បាយមានតែ បាយនិងអំបិល ដែលលោកយាយខ្ចប់ឱ្យប៉ុណ្ណោះ។
ពេលនេះលោកយាយ បានយកខ្សែគោ និងក្រមាចាស់ នេះធ្វើជាកាដូសម្រាប់ថ្ងៃបញ្ចប់ការសិក្សារបស់ខ្ញុំពីបណ្ឌិតសភាយោធាអាមេរិក។ គាត់បានប្រាប់ខ្ញុំថាគាត់រក្សាទុក ព្រោះពេលនឹកចៅម្ដងៗ យាយយកវាមកមើលដើម្បីកុំអោយនឹកចៅពេក។
លោកយាយបន្តទៀតថា ពេលនេះយាយប្រគល់វាអោយចៅវិញហើយ ទោះទៅដល់ទីណាសូមចៅកុំភ្លេចកំណើតរបស់ខ្លួនដែលធ្លាប់ជាក្មេងឃ្វាលគោអោយសោះ។ ខ្ញុំស្ទើរស្រក់ទឹកភ្នែក ពេលលឺអ្នកមានគុណដែលបីបាច់ថែរក្សាខ្ញុំ តាំងពីទើបនឹងកើត រហូតធំពេញវ័យ មានប្រសាសន៍បែបនេះ។ វាជាកាដូដ៏មានតម្លៃបំផុតក្នុងជីវិតរបស់ខ្ញុំ។ សូមអរគុណលោកយាយជាទីគោរពស្រលាញ់របស់ចៅ»
