សង្គម
លោក ប៊ុតសីហា ម្ចាស់ពានរង្វាន់កម្មវិធីប្រឡងចម្រៀង The Voice Cambodia បានប្រកាសកែខ្លួនឡើងវិញចាប់ផ្ដើមលើវិថីសិល្បៈ ព្រមទាំងលើកដៃសំពះ សុំការលើកលែងទោសពីមហាជនអ្នកគាំទ្រ ចំពោះកំហុសរបស់លោកនាពេលកន្លងមក ពេលនេះអ្នកឧកញ៉ា ឡេងណាវ៉ាត្រា បានសម្រេចផ្ដល់ឱកាសសារជាថ្មីហើយ។
អ្នកឧកញ៉ា ឡេងណាវ៉ាត្រាបានបញ្ជាក់ឱ្យដឹងថា កន្លងទៅពេលដែលបើកក្រុមហ៊ុនដំបូង លោកយឹមតាស្រង់ ដែលជាអ្នកគ្រប់គ្រងបានទាក់ទងមនុស្សពីនាក់គឺ តន់ ចាន់សីម៉ា និង ប៊ុត សីហា ហើយណាត់គាត់ជួប ប៉ុន្តែប្អូន ប៊ុត សីហា គាត់បែរជាមិនគោរពពេលវេលាមកជួប ហើយក្រុមហ៊ុនក៏សម្រេច មិនចរចាជជែកគ្នាទៀត ។ តែយ៉ាងណាក៏ដោយពេលនេះ បើសិនជាពុកម៉ែបងប្អូនគាំទ្រ ឲ្យខ្ញុំបាទ ផ្ដល់ឱកាសឲ្យគាត់ ខ្ញុំនឹងផ្ដល់ឱកាសគាត់ តែត្រូវសួរគាត់សិនថាគាត់ចង់ឬអត់?
ទោះបីជាក្រុមហ៊ុនព្រមទទួលក៏ប៉ុន្តែដាច់ខាតកុំអោយលើសខ្សែបន្ទាត់ក្រហម ត្រូវតែគោរពវិន័យនិង លក្ខន្តិកៈរបស់ក្រុមហ៊ុន ហើយក៏សូមឱ្យបងប្អូនទាំងអស់គ្នាធ្វើជាសាក្សីផង សំណេរខ្ញុំនេះក៏អាចជាភស្តុតាងមួយ កុំឱ្យអ្នកដែលចង់ជួយទៅជាអ្នកដែលមានកំហុស ព្រោះអ្នកជោគជ័យនីមួយៗមិនមែនមានត្រឹមតែ អ្វីដែលជាពីកំណើតទាំងអស់នោះទេ ត្រូវតែពង្រឹងសមត្ថភាពបន្ថែមគ្រប់ផ្នែក ទើបអាចឈរជើងបាន។
បទចំរៀងមួយបទល្បីគឺត្រូវការ សំឡេងពិរោះនិពន្ធទំនុកច្រៀងល្អ និពន្ធមេឡូឌីល្អ និពន្ធបទភ្លេងល្អផលិតវីដេអូល្អ ជាពិសេសនោះអ្នកចម្រៀងត្រូវតែ តស៊ូព្យាយាមអត់ធ្មត់ គោរពវិន័យ ពង្រឹងសមត្ថភាពជាប្រចាំ ច្រើនណាស់ ទើបអាចក្លាយជាអ្នកជោគជ័យលើវិស័យចម្រៀងបាន។
ក្រោយទទួលបានការផ្ដល់ឱកាសនេះ តាមរយៈទំព័រហ្វេបុកផ្លូវការរបស់លោកប៊ុត សីហា បានលើកឡើងយ៉ាងខ្លីថា «ឲ្យតែបានរស់ បានអ្វីដែលយើងចង់បាន ហើយអាចបន្តទៅមុខទៀតបាន ខ្ញុំនិងប្រឹងប្រែង គ្រប់កាលៈទេសៈ អរគុណ លោកបងឧញ្ញ៉ា ដែលផ្តល់ឱកាសឲ្យខ្ញុំបាទបានបង្កើតអាជីពសារជាថ្មី ប្រសិនជាអាចខ្ញុំនិងប្រឹងប្រែង»
ជាមួយគ្នានេះដែរអ្នកគាំទ្រលោកបានសម្ដែងការត្រេតអរជំនួស និងសង្ឃឹមថាលោកនឹងចាប់ឱកាសល្អនេះ ហើយពង្រឹង កសាងកិត្តិយសឡើងវិញ ព្រោះឱកាសល្អៗ មិនមានច្រើនដងទេក្នុងឆាកជីវិតឡើយ។
