សង្គម
ចាប់តាំងពីចូលប្រឡូកក្នុងសិល្បៈតារាចម្រៀងយុវវ័យ តន់ ចន្ទសីម៉ា មិនទាន់មានឱកាស បានចេញទៅសម្តែងនៅក្រៅប្រទេសម្តងណាទេ ប៉ុន្តែនៅក្នុងពេលនេះកញ្ញាបានបង្ហាញភាពរីករាយជាខ្លាំងក្រោយមានឱកាសបានចេញទៅសម្តែងនៅប្រទេសកូរ៉េជាលើកដំបូង ។
បើទោះបី ពិធីបុណ្យភ្ជុំបិណ្ឌនៅក្នុងឆ្នាំនេះ តន់ ចន្ទសីម៉ា មិនបានចូលរួមនៅក្នុងស្រុកជាមួយក្រុមគ្រួសារក៏ពិតមែន តែកញ្ញា បានបង្ហាញអារម្មណ៍រំភើបដោយបានចេញទៅសម្តែងជួបបងប្អូនខ្មែរនៅប្រទេសកូរ៉េជាលើកដំបូង។តារាចម្រៀងរូបនេះបានឱ្យដឹងថា«នាងខ្ញុំទៅច្រៀងប្រគំតន្ត្រីនៅកូរ៉េលើកទីមួយបងប្អូនកុំភ្លេចមកលេង សីម៉ា ផងសូមផ្ញើរក្ដីស្រលាញ់ទៅអ្នកទាំងអស់គ្នា»។ ការចេញទៅសម្តែងនៅប្រទេសកូរ៉េខាងត្បូងរបស់ តន់ ច័ន្ទសីម៉ា គឺជាការរៀបចំដោយស្ថានទូតកម្ពុជាក្រសួងការងារក្រុមការងារយុវជនESEAនិងសាលាក្រុងអានសាន។ មិនទាន់មានការបញ្ជាក់ថាតើកញ្ញា តន់ ចន្ទសីម៉ា ទៅសម្តែងនៅប្រទេសកូរ៉េរយៈពេលប៉ុន្មានថ្ងៃឡើយ ។
ត្បិតមិនមានវត្តមាននៅក្នុងស្រុកក៏ពិតមែន ប៉ុន្តែមុន ចេញទៅសម្តែងជូនបងប្អូនពលករខ្មែរ រស់នៅប្រទេសកូរ៉េ តន់ ចន្ទសីម៉ា បានថតនូវបទចម្រៀងថ្មីៗជាច្រើនបទសម្រាប់អ្នកគាំទ្រនៅក្នុងស្រុកក្នុងឱកាសពិធីបុណ្យភ្ជុំបិណ្ឌនេះដោយកញ្ញា បានចាប់ដៃគូជាមួយកំពូលតារា ចម្រៀង ព្រាប សុវត្ថិ និងលោក ខេម ។
អ្វីដែលចាប់អារម្មណ៍តារាចម្រៀង តន់ ចន្ទសីម៉ា ត្រូវបានគេចាត់ទុកជាគ្រាប់ពេជ្រនៅក្នុងផលិ តកម្ម Galaxy Navatra ដូចដែលដឹងស្រាប់ហើយថា ប៉ុន្មានឆ្នាំចុងក្រោយនេះ កញ្ញាកាន់តែមានឈ្មោះបោះសំឡេងក្នុងវិស័យចម្រៀង ក្រោយចូលជ្រកក្រោមទ្រនំផលិតកម្ម Galaxy Navatra ព្រោះសឹងតែគ្រប់បទចម្រៀង សុទ្ធសឹងតែទទួលបានការគាំទ្រខ្លាំង និងល្បីល្បាញពេញបណ្តាញសង្គម ទាំង Tik Tok និង Youtube ជាដើម។
អ្វីដែលចាប់អារម្មណ៍កាន់តែឡើងកូដរូបសម្រស់ ជាពិសេសទម្រង់មុខរបស់តារាចម្រៀងដែលមានប្រភពមកពីខេត្តតាកែវរូបនេះបានផ្លាស់ប្តូរស្ទើរតែទាំងស្រុង។ រហូតមានការលាន់មាត់ថា សម្រស់របស់ តន់ ចន្ទសីម៉ា ប្រែប្លែកតាមទឹកលុយ ។ ក្នុងនោះដែរ តន់ ចន្ទសីម៉ា ក៏មានឱកាសក្តោបបានការថតស្ប៉តពាណិជ្ជកម្មធំៗដែលមានដូចជាអ្នកតំណាងឱ្យផលិតផលរក្សាសម្រស់ គ្រឿងអេឡីចត្រូនិច និងសម្អាងការជាដើម ។ បើនិយាយពីតម្លៃខ្លួនរបស់កញ្ញា ខ្ពស់កប់ដែលតារាល្បីល្មមៗសុំចាញ់ ។ ដោយសារតែតម្លៃខ្លួន តន់ ចន្ទសីម៉ា ខ្ពស់ខ្លាំងទើបគេកម្រឃើញកញ្ញា បង្ហាញវត្តមាននៅក្នុងកម្មវិធីប្រគំតន្រ្តីនៅតាមស្ថានីយទូរទស្សន៍នានា ។ កន្លងមកធ្លាប់មានការបង្ហើបថា ឡើងកម្មវីធីទូរទស្សន៍ម្តងកញ្ញា ស៊ីប្រមាណជា ១ពាន់ដុល្លារ ទៅ ពីរពាន់ដុល្លារ ដែលធ្វើឱ្យអ្នករៀបចំកម្មវិធីទូរទស្សន៍មិនហ៊ានអញ្ជើញ ៕
