√ មន្ត្រីជាន់ខ្ពស់ក្រសួងសាធារណការថា «ដោយសារស្លាកសញ្ញាពូថៅដៃនេះ ប៉ុន្មានថ្ងៃនេះខ្ញុំ និងក្រុមការងារមិនបានសម្រាកស្រួលទេ

សង្គម

អាម៉ាប៉ាប៉ាញ៉ូស

ស្របពេលដែលផ្លូវល្បឿនលឿនភ្នំពេញ-ព្រះសីហនុ បើកដំណើរការសាកល្បងឱ្យប្រើប្រាស់ប៉ុន្មានថ្ងៃមកនេះ ក្រៅពីការសរសើរផ្លូវស្អាត ធ្វើដំណើរលឿនជាងមុន ក៏មានការចាប់អារម្មណ៍ខ្លាំងទៅលើស្លាកសញ្ញាពូថៅដៃ ដែលដាក់នៅលើផ្លូវនេះផងដែរ។

មានការលើកឡើង ចោទជាសំណួរយ៉ាងច្រើនទាក់ទងនឹងស្លាកសញ្ញានេះ ខណៈស្លាកសញ្ញានេះមិនមានក្នុងច្បាប់ចរាចរណ៍ផ្លូវគោកនៅកម្ពុជាទេ។ ជុំវិញចម្ងល់ទាំងនេះ បើតាមលោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងនៅលើបណ្ដាញសង្គមរបស់លោកថា៖

«ដោយសារស្លាកសញ្ញាពូថៅដៃនេះ ប៉ុន្មានថ្ងៃនេះខ្ញុំ និងក្រុមការងារមិនបានសម្រាកស្រួលទេ នេះក៏ដោយសារក្រុមហ៊ុនមុននឹងដាក់មិនបានពិភាក្សាជាមួយក្រសួងជាមុនសិន ដោយគាត់ផលិតដាក់តាមផ្លូវជាសញ្ញាថា ហាមកាប់ឈើ និងកាត់របងការពារសុវត្ថិភាពផ្លូវ ។

ដោយមានចម្ងល់ជាច្រើនពីបងប្អូនតាមបណ្ដាញទំនាក់ទំនងសង្គមលើស្លាកសញ្ញាពូថៅដៃនេះ ក្រសួងក៏បានអោយក្រុមហ៊ុនដកចេញរួចរាល់ហើយដែរ ។ សូមបងប្អូនមេត្តាជ្រាប និងសូមមេត្តាអធ្យាស្រ័យដែលក្រុមហ៊ុនមានការភ័ណ្ឌច្រឡំដោយអចេតនានេះ និងសូមជូនពរការធ្វើដំណើរលើផ្លូវល្បឿនលឿនបានប្រកបដោយសេចក្តីសុខសុវត្ថិភាព និងជួយលើកតម្កើងសមិទ្ធិផលជាតិយើងទាំងអស់គ្នា ។»