សិល្បៈ
មិនចាញ់មិត្តរួមអាជីពប៉ុន្មានឡើយតារាចម្រៀងប្រចាំផលិតកម្មសាន់ដេ លីនដា បានចេញទៅ សម្តែងនៅសហរដ្ឋអាមេរិកនៅឱកាសចុងឆ្នាំ ២០២២ នេះ ។ បើតាមដឹងសម្រាប់ការចេញ ទៅសម្តែងនៅប្រទេសជឿនលឿនមួយនេះមិនមែនមានតែតារាចម្រៀង លីនដា ម្នាក់ទេគឺមាន លោក វេហាស៍ ផងដែរ ។ ការចាកចេញទៅសម្តែងរបស់តារាចម្រៀងរូបរាងតូចល្អិតរូបនេះ ក៏ទទួលបានការជូនពរពីសំណាក់ហ្វេនៗជាច្រើន ។
លីនដា ក៏ជាតារាចម្រៀងដែលមានប្រជាប្រិយភាពម្នាក់ដែរនៅក្នុងចំណោមតារាចម្រៀង សុខ ពិសី អ៊ីវ៉ា និង វីរៈ និច្ច ហើយបទដែលធ្វើឱ្យអ្នកគាំទ្រចាប់អារម្មណ៍នឹងស្គាល់នាងនោះគឺបទ «មានសង្សារជាព្រាននារី»។ក្រោយពីជំងឺកូវីដបានធូរស្រាលតារាមួយចំនួនក៏បានចាកចេញ ទៅសម្តែងនៅបរទេសជាបន្តបន្ទាប់ ហើយក្នុងនោះក៏មានវត្តមានតារាចម្រៀង លីនដា ម្នាក់ដែរ ។
នាងបានចាកចេញទៅសម្តែងនៅសហរដ្ឋអាមេរិកកាលពីថ្ងៃទី ២៧ម្សិលមិញនេះ ហើយនេះជាលើកដំបូងសម្រាប់ការចេញទៅសម្តែងនៅសហរដ្ឋអាមេរិករបស់ លីនដា ។ សម្រាប់ការចេញទៅសម្តែងនៅប្រទេសជឿនលឿនមួយនេះ លីនដា ក៏បានបង្ហាញនូវ អារម្មណ៍រីករាយហើយរំពឹងថាការសម្តែងនាងនឹងទទួលបានការគាំទ្រពីពុកម៉ែបងប្អូនដែលរស់នៅទីនោះ ។ មួយវិញទៀតនាងក៏បានជួបសម្តែងជាមួយតារារៀមច្បងលោក មាស សាលី ផងដែរ។
ចូលប្រឡូកក្នុងសិល្បៈរាប់ឆ្នាំនៅក្នុងផលិតកម្មសាន់ដេ លីនដា ត្រូវបានគេចាត់ទុកជាតារា ចម្រៀងដែលកម្រលេចឮព័ត៌មានស្នេហាអ្វីឡើយ ។ បើក្រឡេកមើលរូបសម្បត្តិ នឹងការរៀបចំ ខ្លួនរបស់នាងក៏ស៊ីវិល័យមិនធម្មតាដែរ ៕
