សង្គម
ជុំវិញទៅនឹងរឿងអ្នកច្នៃម៉ូត លោក ឯម រៀម បានធ្វើឱ្យអ្នកលេងបណ្ដាញសង្គមជាច្រើនមានការប្រតិកម្ម និងក្នុងនោះក៏មានទាំងមតិស្របផងដែរ ដែលធ្វើឱ្យបន្តមានការជជែកវែកញែកដដែល ។ ក្រោយពីឃើញបែបនេះ ឯកឧត្តម ហ៊ុន ម៉ានី ប្រធានសហភាពសហ័ពន្ធយុវជនកម្ពុជា និងជាអ្នកតំណាងរាស្ត្រមណ្ឌលកំពង់ស្ពឺ ស្នើពីការខ្វែងយោបល់ ត្រឡប់មកស្វែងយល់បន្ថែមពីជំហរ និងភាពផ្សេងគ្នានៃគំនិត។
ជាមួយគ្នានោះឯកឧត្តម ក៏សង្ឃឹមអាជ្ញាធរ និងអ្នកពាក់ព័ន្ធសហការគ្នាសម្របសម្រួល ដើម្បីរកចំណុចរួម ជាប្រយោជន៍សម្រាប់ជាតិទាំងអស់គ្នា។ ក្នុងខ្លឹមសារឯកឧត្តមបានបញ្ជាក់ឱ្យដឹងនៅសារទាំងស្រុងនេះថា៖
«ខ្ញុំបានតាមដានយ៉ាងយកចិត្តទុកដាក់នូវការផ្លាស់ប្តូរយោបល់គ្នាក្នុងចំណោមសាធារណជន ស្តីពីការបង្ហាញខ្លួនរបស់លោក ឯម រៀម ក្នុងរូបភាពសម្លៀកបំពាក់ (ដោយច្នៃចេញពីហូលខ្មែរ) បែបពាក់កណ្តាលខ្លួនក្នុងកម្មវិធីពានរង្វាន់ Pleng Music Award ឆ្នាំ២០២៣។ ខ្ញុំផ្ទាល់យល់ថា ការបញ្ចេញទស្សនៈទាំងនោះ ពិតជាមានតម្លៃ ប៉ុន្តែយើងមិនគួរឲ្យការបញ្ចេញយោបល់ទាំងនោះ ក្លាយជាទំនាស់ ការរិតត្បិត ឬការបែកបាក់ណាមួយក្នុងសង្គមយើងឡើយ។
ក្នុងន័យនេះ ខ្ញុំសូមស្នើឲ្យសាធារណជន មេត្តាចៀសវាងនូវការខ្វែងយោបល់គ្នានេះ ដោយគួរត្រឡប់មកស្វែងយល់បន្ថែមពីជំហរ និងភាពផ្សេងគ្នានៃគំនិត។ ជាមួយគ្នានេះ ខ្ញុំក៏សង្ឃឹមដែរថា អាជ្ញាធរមានសមត្ថកិច្ច និងអ្នកពាក់ព័ន្ធទាំងអស់ ជាពិសេសក្រសួងសេនាធិការ អ្នករៀបចំកម្មវិធី រួមទាំងបុគ្គល ដែលជាកម្មវត្ថុផ្ទាល់ នឹងសហការសម្របសម្រួលលើកិច្ចការនេះ ដើម្បីរកចំណុចរួម ដែលជាប្រយោជន៍សម្រាប់ជាតិយើងទាំងអស់គ្នា។»
