យោងតាម AMS SPORTS អ្នកស្រី ពុធ ធីតា ប្រធានក្លិបបាល់ទាត់បឹងកេត ថ្លែងថា សៀង ចន្ធា ពុំបានមក Pre-season នៅថៃ ព្រោះត្រូវត្រៀមចេញទៅលេងនៅលីគកាតារក្រោមកិច្ចសន្យាខ្ចីពីបឹងកេត។ សៀង ចន្ធា នឹងចេញដំណើរនៅថ្ងៃទី២២ កក្កដាដេីម្បីឱ្យទាន់ដំណេីរ Pre-season របស់ក្លិបថ្មីនៅកាតារដែលត្រូវចេញទៅ Pre-Season នៅអឺរ៉ុប។
បន្ថែមពីនេះ លោក បែ មករា អគ្គលេខាធិការក្លិបបានរៀបរាប់បន្ថែមថា៖ ជាច្រេីនរដូវកាលចុងក្រោយនេះ សៀង ចន្ធា ជាកីឡាករសំខាន់បំផុតម្នាក់ក្នុងជម្រេីស១១នាក់ដំបូងរបស់បឹងកេតនៅក្នុងការប្រកួតប្រជែងពានរង្វាន់នានា ទាំង Cambodian Premier League និងពានរង្វាន់សម្ដេចអគ្គមហាសេនាបតីតេជោហ៊ុនសែន។ ក្នុងបាល់ទាត់ ដេីម្បីឈ្នះការប្រកួត យេីងត្រូវទាត់ឱ្យចូលទីគេ ហេីយដេីម្បីទាត់ចូលទីគេបាន យេីងត្រូវការខ្សែប្រយុទ្ធល្អ។ ចន្ធា គឺជាម្នាក់ក្នុងចំណោមនោះ។ ប៉ុន្តែបឹងកេតមិនគិតប្រយោជន៍របស់ខ្លួនធំជាងប្រយោជន៍ជាតិនិងកីឡាករនោះទេ។ តាំងពីដេីមមក នៅពេលមានឱកាសល្អសម្រាប់កីឡាករមកដល់ បឹងកេតមិនដែលរារាំងឡេីយ ផ្ទុយទៅវិញបឹងកេតមានតែលេីកទឹកចិត្តថែម ជំរុញថែមឱ្យកីឡាកររបស់ខ្លួនបានចេញទៅប្រកបអាជីពនៅក្រៅប្រទេស ទៅដល់លីគដែលល្បីជាង ខ្លាំងជាង ដេីម្បីលេីកស្ទួយមុខមាត់បាល់ទាត់កម្ពុជា ជ្រោងទង់ជាតិកម្ពុជាឱ្យបក់រវិចនៅលេីឆាកអន្តរជាតិ ដេីម្បីឱ្យអន្តរជាតិស្គាល់អំពីសក្ដានុពលកម្ពុជាកាន់តែច្រេីនឡេីង។ ជាមួយគ្នានេះ បឹងកេតចង់ឱ្យកីឡាករបាល់ទាត់កម្ពុជាឡេីងកម្រិតស្តង់ដាកាន់តែខ្ពស់ ក្លាយជាតួអង្គគំរូសម្រាប់យុវជនជំនាន់ក្រោយឱ្យមានក្ដីសុបិនធំនិងក្លាហាន ហ៊ានស្រមៃ និងអាចបោះជំហានវែងបានដល់ទីកាន់តែខ្ពស់នៅលីគក្រៅប្រទេសបានកាន់តែច្រេីន។
កន្លងទៅ បឹងកេតបានធ្វេីវាជាមួយកីឡាករ ចាន់ វឌ្ឍនាកា ក្លាយជាកីឡាករកម្ពុជាដំបូងគេដែលលេងនៅជប៉ុន។ ឥឡូវនេះយេីងធ្វេីវាម្ដងទៀតជាមួយ សៀង ចន្ធា ឱ្យក្លាយជាកីឡាករកម្ពុជាដំបូងបង្អស់ដែលបានទៅលេងនៅលីគក្នុងប្រទេសកាតារ ខណៈនៅរង់ចាំការធ្វេីតេស្តសុខភាពមួយដំណាក់កាលទៀត។ នៅពេលតេស្តសុខភាពជោគជ័យ នៅទីនោះ ចន្ធា នឹងបានហាត់ជាមួយកីឡាករល្អៗ គ្រូបង្វឹកពូកែៗ លេងទល់នឹងក្រុមខ្លាំងៗ សម្រាប់ជាជំហានក្នុងការអភិវឌ្ឍខ្លួនបន្ថែមទៀតដែលអាចឱ្យគេឡេីងកម្រិតទៅលេងនៅលីគកាន់តែខ្ពស់និងកាន់តែធំ។ ប្រសិនអ្វីៗជោគជ័យ ខ្ញុំសង្ឃឹមថាយុវជនទាំងឡាយដែលកំពុងហាត់បាល់ទាត់នឹងកាន់តែមានភាពក្លាហានក្នុងការស្រមៃឱ្យធំ សំដៅឱ្យខ្ពស់ ដែលជាកម្លាំងចិត្តនៅក្នុងការប្រឹងប្រែងរបស់ពួកគេ និងមានកីឡាករខ្មែរគំរូល្អកម្រិតខ្ពស់សម្រាប់ពួកគេខិតខំតាម។ សូមជូនពរឱ្យ ចន្ធា ទទួលបានជោគជ័យនៅក្នុងបេសកកម្មថ្មីនិងធំមួយនេះ។
រូបភាព៖ ក្លិបបាល់ទាត់បឹងកេត