បុរសដែលបានប្រើអំពើហិង្សាទៅលើស្ត្រីម្នាក់ក្នុងហេតុការណ៍ជិះម៉ូតូសាចទឹកដាក់គ្នា កាលពីល្ងាចថ្ងៃទី២៥ ខែសីហា ឆ្នាំ២០២៣នេះ ត្រូវបានអធិការដ្ឋាននគរបាលខណ្ឌសែនសុខចាប់ឃាត់ខ្លួនបានហើយ ខណៈមហាជនកំពុងរង់ចាំមើលថា តើលទ្ធផលរបស់គាត់ទៅជាយ៉ាងណា ក្រោយមិនចូលខ្លួនដោះស្រាយរយៈពេល៣ថ្ងៃមកនេះ?
ជនសង្ស័យមានឈ្មោះ ទី សុផាណា តួនាទី អនុប្រធាននាយកដ្ឋាន នៅក្រសួងមុខងារសាធារណៈ។
សូមជម្រាបជូនថា ករណីឈានដល់ការប្រើប្រាស់ហិង្សា ព្រោះរឿងបន្តិចបន្តួចនេះ នេះផ្ដើមឡើងពី ពីរនាក់បងប្អូនជិះម៉ូតូឌុបគ្នា សាចទឹកលើបុរសម្នាក់កាលពីល្ងាចថ្ងៃ ២៥ សីហា ២០២៣ បើទោះបីជាស្ត្រី និងប្អូនប្រុសបានសុំទោសហើយ តែបែរជាបុរសនោះមិនទទួលការសុំទោស រហូតបុរសនោះ ប្រើពាក្យអសុរស ទើបមានការប្រកែកគ្នា និងឈានទៅដល់ការទះនាងមួយដៃថែមទៀត។
ដោយឃើញបុរសរូបនោះវាយបងស្រី ប្អូនប្រុសក៏ទាញមួកវាយវិញ រហូតដល់ការប្រើហិង្សាទៅវិញទៅមក បង្កឱ្យមានការភ្ញាក់ផ្អើលពេញបណ្ដាញសង្គម រហូតមកដល់ថ្ងៃទី ២៨ ខែសីហា ឆ្នាំ២០២៣នេះ សមត្ថកិច្ចនគរបាលខណ្ឌសែនសុខ បានឃាត់ខ្លួនបានហើយ។
នេះហើយខឹងខុស ខឹងខូច ខឹងខាត អាចឈ្នះគេមួយថ្ងៃ តែនាំបញ្ហាដល់ខ្លួនឯងមួយជីវិត បច្ចុប្បន្ន ជននេះកំពុងសួរនាំនៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តតាមនិតិវិធីសមត្ថកិច្ច។
