សន្និសីទប្រចាំឆ្នាំ PH Conference 2023 រៀបចំដោយក្រុមហ៊ុន ប៉េង ហួត គ្រុប

ភ្នំពេញ៖ ក្រុមហ៊ុន ប៉េង ហួត គ្រុប បានរៀបចំកម្មវិធីសន្និសីទប្រចាំឆ្នាំ ឬ PH Conference 2023 សម្រាប់អ្នកចូលរួមដោយសេរី ក្រោមប្រធានបទ “ការរួមចំណែកជាវិជ្ជមានរបស់ឪពុកម្តាយចំពោះការលូតលាស់ផ្នែកបញ្ញាស្មារតីរបស់កូន”​ ក្នុងគោលបំណង បង្កើនការយល់ដឹងអំពីផលប៉ះពាល់ផ្លូវចិត្តទាំងឪពុកម្តាយ និងកូន ហើយក៏ជាការរួមចំណែកក្នុងការយកចិត្តទុកដាក់លើកិច្ចការសង្គម និងការគ្រប់គ្រងសុខុមាលភាពឱ្យមានភាពល្អប្រសើរផងដែរ។

សន្និសីទ PH Conference នេះត្រូវបានរៀបចំឡើងនារសៀល ថ្ងៃសៅរ៍ ទី០២ ខែធ្នូ ឆ្នាំ២០២៣ ស្ថិតនៅទីតាំងអគារសាលសន្និបាត និងប្រារព្ធពិធីមង្គលការ ភីអេច ហ្រេ្គនហល (PH Grand Hall) ក្នុងគម្រោង បុរី ប៉េង ហួត ហ្គ្រេនស្តា ផ្លាទីនីម (បឹងស្នោ) ខណ្ឌច្បារអំពៅ​ រាជធានីភ្នំពេញ ដែលមានវត្តមានចូលរួមពីវាគ្មិនកិត្តិយសដែលមានជំនាញ និងបទពិសោធន៍ជាច្រើនឆ្នាំលើសុខភាពផ្លូវចិត្តកុមារ និង ជំទង់ ពីមជ្ឈមណ្ឌលថែទាំ និងស្រាវជ្រាវការប៉ះទង្គិចផ្លូវចិត្ត (CTRO) និងអ្នកជំនាញមកពីសាលាអប់រំពិសេសក្តីសង្ឃឹមកុមារ (Hope Kids)។

សន្និសីទប្រចាំឆ្នាំ PH Conference គឺជាការចែករំលែកចំណេះដឹង និងបទពិសោធន៍ទាក់ទងទៅនឹងប្រធានបទល្អៗ ពីវាគ្មិនដែលមានជំនាញផ្សេងៗចូលរួមក្នុងការចែករំលែកទៅកាន់សាធារណជន ដែលនេះគឺជាវប្បធម៌ចែករំលែកចំណេះដឹង និងបទពិសោធន៍ដល់សង្គម ហើយក៏ជាផ្នែកមួយនៃការរួមចំណែកលើកកម្ពស់វិស័យអប់រំផងដែរ ដោយស្របតាមបង្គោលទាំង៣ នៃការងារសង្គមរបស់ ប៉េង ហួត គ្រុប ពោលគឺ៖ ការអប់រំ បរិស្ថាន និង សង្គម៕