បើទោះជាធ្លាប់រាប់អានគ្នានឹងជាមនុស្សដែលមានឈ្មោះល្បីនៅក្នុងបណ្តាញសង្គមក្តី តែលោ ក ផែង វណ្ណៈ ហាក់នៅមានទឹកមាត់សាបដែលមកដល់ពេលនេះលោកមិនទាន់បានការសុំទោសពីសំណាក់លោកស្រី ទ្រី ដាណា និងលោក រស់ រាជ្ជសាល ឡើយ។ ក្រៅពីប្រកាសផ្តាច់ទំនាក់ទំនងគ្នាលោក ផែង វណ្ណៈ ក៏បានធ្វើការប្លុកហ្វេសប៊ុក និងតេឡេក្រាមរបស់ថៅកែពេជ្ររូបនេះរួចរាល់ដែរ ។
ជឿជាក់ថាអ្នកលេងបណ្តាញសង្គមពិតជាបានជ្រាបហើយថាដោយសារមិនពេញចិត្តនៅក្នុងការប្រើប្រាស់ពាក្យសម្តីរបស់លោកស្រី ទ្រី ដាណា និងស្វាមីនៅក្នុងរឿងលុយធីប ទើបធ្វើឱ្យលោក ផែង វណ្ណៈ ដែលជាអ្នករាប់អានជាមួយលោកស្រី បានសំណូមពរឱ្យប្តីប្រពន្ធថៅកែពេជ្ររូបនេះធ្វើការសុំទោសមហាជនដើម្បីបញ្ចប់រឿង ។ លោកទុកឱកាសឱ្យ២៤ម៉ោងបើមិនសុំទោសលោកនឹងផ្តាច់ការរាប់អាន ។ ប៉ុន្តែ២៤ម៉ោងបានកន្លងផុតទៅគេមិនបានឃើញលោកស្រី ទ្រី ដាណា និងស្វាមីសុំទោសលោក ផែង វណ្ណៈ ក៏ដូចជាមហាជនឡើយដែលធ្វើឱ្យលោក ផែង វណ្ណៈ សម្រេចផ្តាច់ការទាក់ទងដោយធ្វើការប្លុកហ្វេសប៊ុក និងតេឡេក្រាមរបស់ប្តីប្រពន្ធអ្នកលក់អនឡាញរូបនេះតែម្តង ។
លោក ផែង វណ្ណៈ បានបង្ហោះការប្លុក ហ្វេសប៊ុក និង តេឡេក្រាម ជាភស្តុតាងរួមនឹងសារថា«ដល់ម៉ោងហើយសូមជំរាបលា ទាំងហ្វេសប៊ុក ទាំងតេឡេក្រាម»។បន្ថែមពីនេះលោក ផែង វណ្ណៈ បានឡាយវីដេអូនិយាយថាលោកបានទុកកិត្តិយសឱ្យ តែអ្នកមិនផ្តល់កិត្តិយសឱ្យលោកដូច្នេះមិនបាច់រាប់អានទេមនុស្សបែបនេះ ហើយលោកក៏បានផ្តាំទៅថៅកែពេជ្ររូបនេះឈប់ឱ្យជំនួយការទាក់ទងមកលោកទៀត។មនុស្សបែបនេះមិនបាច់រាប់អានជាមួយក៏បាន ។ ជាចុងក្រោយលោកថាមិនបានចង់តោងល្បីនៅក្នុងរឿងនេះទេព្រោះលោកល្បី១០ ទៅ ២០ឆ្នាំហើយពោលលោកល្បីតាំងពីអ្នកទាំងនោះមិនទាន់ឈប់បៅដោះម្លេះ។
ក្រៅពីសំណូមពរឱ្យបញ្ចប់រឿងលុយធីប លោក ផែង វណ្ណៈ ថាធ្វើខុសសុំទោសមហាជនគឺចប់បើឈ្លោះជាមួយបុគ្គលមិនអីទេ តែឈ្លោះជាមួយមហាជនគឺខាតហើយ ។ក្នុងនាមជាចាស់ទុំ លោក ផែង វណ្ណៈ បានរៀបរាប់ថា«ខ្ញុំដើរមកដល់ថ្ងៃនេះខ្ញុំយកគុណធម៌ជាធំយកអំពើល្អជាត្រីវិស័យ ជាពិសេសខ្ញុំធ្លាប់ជាអ្នកក្រម្នាក់ខ្ញុំយល់ច្បាស់ពីអារម្មណ៍អ្នកក្រនៅពេលគេមើលងាយគេប្រមាថ។ ខ្ញុំមិនអាចឈរអោបដៃឈរមើលអ្នកមានប្រមាថប្រជាពលរដ្ឋយើងជាដាច់ខាត។បើខ្ញុំក្បត់ប្រជាពល រដ្ឋយើង ខ្ញុំមិនមែនឈ្មោះ ផែង វណ្ណៈទេ។ ទោះបីស្ថិតក្នុងកាលៈទេសៈណាក៏ដោយ ខ្ញុំនឹងនៅជាមួយបងប្អូនប្រជាពលរដ្ឋយើងជានិច្ច»៕