ជុំវិញនឹងករណីឡាន Jeep បុកកីឡាករវៃសីជម្រើសជាតិម្នាក់ស្លាប់នៅខណ្ឌទួលគោក កាលពីថ្ងៃទី១៤ ខែធ្នូ ឆ្នាំ២០២៣កន្លងទៅមិនទាន់ចប់នៅឡើយទេ ដោយម្ដាយរបស់ម្ចាស់ឡាន Jeep បានប្ដឹងភរិយា និងក្រុមគ្រួសាររបស់ជនរងគ្រោះ ក្នុងនោះដើមបណ្ដឹងឈ្មោះ សុខ លីណា ក៏បានធ្វើការបកស្រាយផងដែរថាកូនរបស់ខ្លួនមិនបានផឹកស្រា មិនបានប្រណាំងរថយន្ត ដោយកូនប្រុសរបស់ខ្លួនបានបើកបរក្នុងផ្លូវរបស់ខ្លួន មិនបានបើកវ៉ាជែងគ្នា និងឲ្យភ្លើងសញ្ញាចរាចរណ៍មុនឆ្លងកាត់ផ្លូវ គោរពតាមច្បាប់ចរាចរណ៍បានត្រឹមត្រូវ។
ទោះបីជាបកស្រាយបែបនេះក្ដី នៅមុននេះបន្តិច រសៀលថ្ងៃទី ១៧ ខែមករា ឆ្នាំ២០២៤នេះ លោក ផែង វណ្ណៈ បានបង្ហោះឱ្យដឹងបន្ថែមទៀតជុំវិញនឹងកូនរបស់លោកស្រី សុខ លីណា នៅថ្ងៃកើតហេតុនោះ បានចូលរួមកម្មវិធីមង្គលការមួយ និងបានផឹកស៊ីជាមួយមិត្តភ័ក្ដិរហូតដល់យប់ជ្រៅទេីបចេញទៅ។ តាមរយៈទំព័រហ្វេសបុកលោកផែង វណ្ណៈ បានឱ្យដឹងថា៖
«ផឹកស្រវឹងហាមបេីកបរ នេះគឺជាបំរាមរបស់ច្បាប់ ! ចុះបេីយុវជនរូបនេះ ផឹកស្រវឹងហើយបេីកឡានប្រណាំងគ្នា បុកគេស្លាប់ ច្បាប់គិតយ៉ាងម៉េច ? មុនពេលកេីតហេតុករណីគ្រោះថ្នាក់ចរាចរណ៍បណ្ដាលឱ្យស្លាប់ គឺល្ងាចថ្ងៃទី ១៤ ខែ ធ្នូ ឆ្នាំ ២០២៣ យុវជនបេីករថយន្ត ហ្ស៉ីប បានចូលរួមកម្មវិធីមង្គលការមួយ និងបានផឹកស៊ីជាមួយមិត្តភ័ក្ដិរហូតដល់យប់ជ្រៅទេីបចេញទៅ ហើយបេីករថយន្ត ប្រដេញគ្នាលឿនលេីសល្បឿនកំណត់ក្នុងទីប្រជុំជន ផ្លូវបំបែកហើយនៅតែលឿន ។
ច្បាប់កំណត់អោយបេីកយ៉ាងលឿនបំផុត ៤០គីឡូម៉ែត្រក្នុងមួយម៉ោង ។ តាមរយៈ វីដេអូរបស់យុវជននេះ មិនមែនល្បឿន ៤០ គីឡូម៉ែត្រក្នុងមួយម៉ោងទេ ។ រូបភាពទាំងអស់នេះ ខ្ញុំមិនមែនយកមកចោទប្រកាន់យុវជនបេីករថយន្តដែលម្ដាយ អះអាងថា ត្រឹមត្រូវនោះ ខុស ឬ ត្រូវទេ ព្រោះខ្ញុំមិនមែនជាអ្នកច្បាប់ ខ្ញុំគ្រាន់តែអោយបងប្អូន បានឃើញ ហើយ ពិចារណាតាម ការយល់ឃេីញរៀងៗខ្លួនតែប៉ុណ្ណោះ ។
តេីឡានបុកម៉ូតូ ឬ ម៉ូតូ បុកឡាន ? វីដេអូនេះ មិនមែនជាវីដេអូកាត់តទេ ។ វីដេអូទី១បុកស្លាប់ វីដេអូមួយទៀត បញ្ជាក់អំពីមិត្តភ័ក្ដិដែលចូលរួមពិធីមង្គលការ ។»