មានការគាំទ្រនិងចូលរួមបញ្ចេញមតិជាច្រើនក្រោយកីឡាការិនីឆ្នើម សួ្រង ភាវី បានបង្ហាញការមិនពេញចិត្តក្រោយអ្នកនាងយល់ថាតារាចម្រៀងល្បីលំដាប់ប្រទេសមួយរុបបែរជាផលិតបទចម្រៀងបែបពង្រីកវប្បធម៌ប្រទេសជិតខាងទៅវិញ ។ បន្ថែមពីនោះអ្នកនាងបានបន្តថាអ្នកនាងជាមនុស្សឃើញត្រូវថាត្រូវខុសថាខុសមិនតែស្ករទេ ។
ក្នុងនាមជាកីឡាការិនីឆ្នើមជំនាញបុកប៊ីយ៉ា ជារឿយៗគេតែងឃើញអ្នកនាង ស្រួង ភាវី បញ្ចេ ញទស្សនៈឬការចែករំលែកគំនិតនានានៅក្នុងបណ្តាញសង្គម ។ យ៉ាងណាមិញថ្មីនេះអ្នកនាងបានបង្ហោះសារខ្លីដែលមានអត្ថន័យថា «ជាតារាល្បី ហើយមានឥទ្ធិពលក្នុងប្រទេសខ្លួន តែផលិតចម្រៀងបែបពង្រីកវប្បធម៌ប្រទេសគេ ហើយបង្រួមវប្បធម៌ប្រទេសខ្លួនទៅវិញ។ ហេតុអ្វី?»។
បន្ថែមពីនេះអ្នកនាងក៏បានសង្កត់ធ្ងន់ថា «ឃើញថាត្រូវខ្ញុំគាំទ្រ ឃើញឆ្គងខុសខ្ញុំរិះគន់ដើម្បីកែលម្អ អត់តែៗស្ករៗជាមួយទេ ខ្លាចកើតទឹកនោមផ្អែម ព្រោះជំងឺតែស្ករធ្វើឱ្យជាតិនិងវប្បធម៌រលាយឆាប់ណាស់»។អ្វីដែលកត់សម្គាល់ដ្បិតមិនបានបញ្ជាក់ចំឈ្មោះថាជាតារាចម្រៀងរូបណាក៏ពិតមែន តែអ្នកលេងបណ្តាញសង្គមជាច្រើនយល់ថាអ្នកនាង ស្រួង ភាវី កំពុងសំដៅទៅលើតារាចម្រៀងដែលមានងារជាឧកញ៉ា ខេមរៈ សិរីមន្ត ដែលទើបចេញបទចម្រៀង «អូនរាំអេន»។ មិនតែប៉ុណ្ណោះMVនៅក្នុងបទចម្រៀង«ឆ្នាំហ្នឹងសប្បាយខ្លាំង» ទៀតសោតក៏មានការបញ្ចូលនូវកាំភ្លើងបាញ់ទឹកដែលជនជាតិថៃនិយមលេងនៅក្នុងពិធីបុណ្យចូលឆ្នាំ ។
ជុំវិញការបង្ហោះសាររបស់អ្នកនាង ស្រួង ភាវី ក៏មានការពេញចិត្តនិងបញ្ចេញទស្សនៈគាំទ្រជាច្រើនដោយអ្នកខ្លះបាននិយាយថា«មែនតើបងឃើញចឹងហួសចិត្ត» «កុំឲ្យតែcopyបទគេមកច្រៀងដូចពីមុនទៀតទៅបានហើយ ពាក្យថាឧកញ៉ាវាគ្មានតម្លៃដូចពីសម័យពីដើមទៀតឡើយក្នុងរាជ្ជកាលនេះមិនគួរឲ្យគោរពវាអស់តម្លៃហើយ» «និយាយត្រូវបង. យើងឱនក្បាលទៅរកថៃរហូត ទាំងដែលជនជាតិថៃមិនដែលអោយតម្លៃខ្មែរយើងផង»។ទោះបីជាមានការលើកឡើងបែបនេះក្តី តែកន្លងមកតារាចម្រៀង ខេមរៈ សិរីមន្ត បានលើកឡើងនៅក្នុងបទសម្ភាសជាមួយអ្នកសារព័ត៌មានកាលពីពេលថ្មីៗនេះថាការសហការជាមួយប្រទេសនានាគឺដើម្បីពង្រីកទីផ្សារសិល្បៈវប្បធម៌ខ្មែរបង្ហាញទៅកាន់ពិភពលោក៕
