ខណៈតារាក្នុងសិល្បៈក៏ដូចជាបុគ្គលល្បីៗនៅក្នុងសង្គមអនឡាញបានបង្ហាញនូវវប្បធម៌ខ្មែរយ៉ាងទូលំទូលាយតាមរយៈការចែករំលែកនូវវីដេអូខ្មែរ Make up យ៉ាងផុសផុលគួរឱ្យកោតសរសើរ។ ងាកមកតារាសម្តែង នី មុន្នីនាថ ឯណេះវិញក៏មិនឱ្យអ្នកគាំទ្រខកចិត្តទេដោយនាងបានបង្ហាញវីដេអូខ្លីដោយមានការចែករំលែកនូវប្រវត្តិវង់ភ្លេងមហោរី។វីដេអូរបស់តារាសម្តែងសម្បុរស្រអែមរូបនេះត្រូវបានមហាជនជាច្រើនពេញចិត្ត តែក្នុងនោះគេបានឃើញអ្នកជិតខាងមួយចំនួនបានចូលមកបញ្ចេញមតិមិនសមរម្យ តែត្រូវ នី មុន្នីនាថ តបយ៉ាងទន់ភ្លន់និងស៊ីជម្រៅទៀតផង ។
វីដេអូ Make upយ៉ាងស្រស់ស្អាតប្រមាណជាង១នាទីរបស់តារាសម្តែង នី មុន្នីនាថ ទទួលបានការពេញចិត្តពីសំណាក់មហាជនជាច្រើន។ក្នុងនោះតារាសម្តែងរូបនេះបានភ្ជាប់សារដែលមានន័យថា«ស្រលាញ់គឺជាការថែរក្សាស្រលាញ់គឺជាការចែករំលែកទោះមិនសូវល្អតែអ្វីទាំងអស់នេះគឺជាការដែលលះបង់និងស្រលាញ់ខំធ្វើឲ្យអស់ពីសម្ថតភាពដើម្បីជាមួយផ្នែកតូចមួយនៃការផ្សព្វផ្សាយនិងថែរក្សាវប្បធម៌ជាតិខ្មែរ ក្នុងនិយមន័យអភិវឌ្ឍន៍ដើម្បីអភិរក្ស។
ដ្បិតមិនមែនជាអ្នកជំនាញនៅក្នុងការរាំរបាំ តែ នី មុន្នីនាថ ពិតជាធ្វើបានយ៉ាងស័ក្តិសមគួរឱ្យសរសើរ ។ បន្ថែមពីនោះ នី មុន្នីនាថ ក៏បានបង្ហាញពីប្រភពនៃពាក្យមហោរីដែលកើតចេញមកពីពាក្យសំស្រឹ្កតដែលតាមភាសាសំស្ក្រឹត «មហោរី» ហៅថា «មនោហារាមនោហារី» ដែលជាវង់ភ្លេងមួយមានឧបករណ៍ច្រើនមុខ ប្រគំដោយបុរសនិងនារីហើយក៏មានរូបចម្លាក់នៅតាមថែវអង្គរ ដោយអ្នកប្រគំភ្លេង មនោហារា មនោហារី នេះ នៅពេលប្រគំក៏មានគេបាំងក្លោះឱ្យផងដែរ។
យោងតាមការស្រាវជ្រាវនូវពាក្យសំស្ក្រឹតមនោហារាមនោហារី គឺមានសិលាចារឹកនៅប្រាសាទប្រែរូប នាសតវត្សទី៩ និងនៅលើផ្ទាំងសិលាចារឹកមួយទៀត នាសតវត្សទី១០ ដែលលោកហ្ស៊ក សេដែស ជនជាតិបារាំងបានសិក្សាស្រាវជ្រាវរកឃើញពាក្យ «មនោហារាមនោហារី» នេះ ហើយបានក្លាយទៅជា «មហោរី» មកដល់សព្វថ្ងៃតែម្តង។
ជាការកត់សម្គាល់ វង់តន្ត្រីមហោរីនេះ ចំនេរក្រោយមក ក៏មានការរីកចម្រើនកាន់តែល្បីសុះសាយឡើង ដែលអ្នកប្រគំវង់ភ្លេងនេះ មានសុទ្ធតែនារីៗផងដែរ ។វីដេអូរួមនឹងការបង្ហាញពីប្រភពពាក្យមហោរីរបស់ តារាសម្តែង នី មុន្នីនាថ ត្រូវបានផ្ទះលេខពីរជាអ្នកជិតខាងបានសម្តែងការកើតទុក្ខមិនសុខចិត្តក៏បានចូលមកបញ្ចេញមតិជាបន្តបន្ទាប់ តែត្រូវតារាសម្តែង នី មុន្នីនាថ តបយ៉ាងទន់ភ្លនថា«នេះជារបស់ខ្មែរពិត ដូចសត្រូវជាមួយគ្នាពីជាតិមុនចឹង !!! នាងខ្ញុំបង្ហាញពីវប្បធម៌ដ៏ផូរផង់របស់ប្រទេសនាងខ្ញុំសោះហ្នឹង ក៏ច្រណែនដែរ»។ ការតបរបស់តារាសម្តែង នី មុន្នីនាថ ទៅនឹងការខមិនផ្តេសផ្តាសរបស់អ្នកជិតខាងនោះត្រូវបានអ្នកគាំទ្រជាច្រើនពេញចិត្ត៕
