តារាចម្រៀង ម៉េង កែវពេជ្ជតា នឹងត្រូវចូលខ្លួនបំភ្លឺទៅតាមដីកាកោះរបស់អយ្យការអមសាលាដំបូងរាជធានីភ្នំពេញនៅក្នុងបណ្តឹងរបស់អតីតប្រធានសមាគម ចន ច័ន្ទលក្ខិណា នៅក្នុងថ្ងៃទី ១០នៅវេលាម៉ោងពីររសៀលនេះ ។ អ្វីដែលចាប់អារម្មណ៍ខណៈកំពុងមានវត្តមាននៅប្រទេសបារាំងតារាចម្រៀងដែលជាចុងបណ្តឹងរូបនេះបានបង្ហាញចម្ងល់មួយចំនួន នឹងបានលើកឡើងថានឹងសហការដោយរីករាយជាមួយតុលាការនៅខែក្រោយដោយមិនគេចវេសឡើយ។
គួរឱ្យដឹងដែរថាតារាចម្រៀង ម៉េង កែវពេជ្ជតា បានទទួលរងបណ្តឹងរបស់អ្នកនាង ចន ច័ន្ទលក្ខិណា ពីបទ «បរិហាកេរ្តិ៍ជាសាធារណៈ ប្រមាថជាសាធារណៈ សម្លុតកុំឱ្យដាក់ពាក្យបណ្តឹង និង ញុះញង់ឱ្យមានការរើសអើង»។ អ្នកនាង ចន ច័ន្ទលក្ខិណា បានធ្វើការប្តឹងតារាចម្រៀង ម៉េង កែវពេជ្ជតា នៅថ្ងៃទី ១៥ ខែឧសភា កន្លងទៅពោលក្រោយបញ្ចប់អណត្តិប្រធានសមាគមសិល្បៈ។ ក្នុងនោះតារាសម្តែងវ័យ៤៤ ឆ្នាំរូបនេះបានសង្កត់ធ្ងន់ថាមិនធ្វើការសម្របសម្រួលតុមូលជាមួយតារាចម្រៀងសំឡេងផ្អែមចាស់វស្សា ម៉េង កែវពេជ្ជតា ឡើយ ។ អ្វីដែលគួរឱ្យកត់សម្គាល់នៅក្នុងថ្ងៃទី ១០នេះតារាចម្រៀង ម៉េង កែវពជ្ជតា ត្រូវទៅបំភ្លឺនៅតុលាការចំពោះបណ្តឹងមួយនេះតាមដីកាកោះ តែកំពុងស្នាក់នៅប្រទេសបារាំងមួយរយៈអ្នកនាងបានលើកឡើងជាចម្ងល់ខ្លះៗបង្ហាញដល់អ្នកគាំទ្រខ្លួននៅក្នុងបណ្តាញសង្គមចំពោះរឿងបណ្តឹងមួយនេះ។
ម្ចាស់បទ«មនុស្សដំបូង»រូបនេះបានរៀបរាប់កាលពីថ្ងៃទី ០៩ ម្សិលមិញនេះថា «ព្រឹកមិញម៉ោង 9 ម៉ោងនៅភ្នំពេញ ថ្ងៃអាទិត្យ ទី 9 ខែ 6 .2024អ្នកផ្ទះខ្ញុំឯភ្នំពេញបានទទួលលិខិតអោយចូលទៅបំភ្លឺហើយ ។ ប៉ុន្តែដំណើរនៃការមកដល់របស់លិខិតនេះហាក់យឺតយ៉ាវខ្លាំងគួរអោយឆ្ងល់ ហើយតក់ក្រហល់ខុសធម្មតា ។ដើម្បីអោយបានយល់ច្បាស់សូមបងប្អូនពិនិត្យមើលលើលិខិតទាំងអស់គ្នា៖
- ថ្ងៃទី 15.05.2024ថ្ងៃគេដាក់ពាក្យប្តឹង ។ 5ថ្ងៃក្រោយ
- ថ្ងៃទី 20.05.2024 ចេញលិខិតកោះ ។ 10ថ្ងៃក្រោយ
- ថ្ងៃទី 30.05.2024 ទើបលិខិតនេះទៅដល់ប៉ុស្តិ ( បុស្តិប៉ូលីសរដ្ឋបាលដែលនៅក្បែរផ្ទះខ្ញុំ ) រហូតដល់ 10ថ្ងៃក្រោយ
- ថ្ងៃទី 9.06. 2024 ព្រឹកមិញថ្ងៃនេះទើបលិខិតកោះនេះបានដល់ដៃអ្នកផ្ទះខ្ញុំឯភ្នំពេញ បង្គាប់អោយខ្ញុំចូលបំភ្លឺនៅថ្ងៃស្អែក ទី 10.06.2024 នេះ ។ បងប្អូនមានចំងល់ដូចខ្ញុំទេ ជាធម្មតាការបញ្ជូនលិខិតពីតុលាការអាចយឺតខ្លះៗតែត្រឹម5ថ្ងៃទៅមួយអាទិត្យយ៉ាងច្រើន ប៉ុន្តែនេះយឺតរហូតដល់ 25ថ្ងៃ ហើយដែលសំខាន់ គឺដីកាមកដល់ថ្ងៃនេះបង្គាប់អោយចូលទៅបំភ្លឺថ្ងៃស្អែក សួរថាដែលមានទេ ?
តើ១ថ្ងៃអ្នកណាអាចធ្វើអ្វីកើតបើមិនបានដឹងខ្លួនថាគេប្តឹងផង កុំថាឡើយពេលនេះខ្ញុំនៅក្រៅប្រទេស បើទោះជាខ្ញុំនៅភ្នំពេញក៏រៀបចំមេធាវី និងឯកសារពាក់ព័ន្ធមិនទាន់ដែរ បើអញ្ចឹងគេធ្វើហ្នឹងចង់យ៉ាងម៉េច ? ចង់អោយខ្ញុំខកខានចូលបំភ្លឺរួចចោទថាខ្ញុំគេច ? ដីកាកោះបានចេញរួចហើយបែជាទុកចោលឡើងយូររហូតដល់ថ្ងៃអោយចូលទើបបញ្ជូនមក បើមិនឆ្ងល់ទើបចម្លែក ។បងប្អូនពុកម៉ែជាទីគោរព ! ខ្ញុំបង្ហោះសារនេះគឺទី១ចង់ជម្រាបជូនបងប្អូនសាធារណៈជនដែលតែងបារម្ភពីសុខទុក្ខខ្ញុំអោយបានជ្រាបថាមានអ្វីខុសប្រក្រតីកើតឡើងក្នុងដំណេីរគេប្តឹងផ្តល់នេះ ។ និងទី២ ក៏ចង់ប្រាប់ទៅនាងហង្សឈាមក្អែកភ្នែកមាន់ព្រៃនិស្ស័យអសិរពិសនៅក្រៅរបងមួយក្បាលដែលតាំងខ្លួនថាជាអ្នកចេះច្បាប់អូស្ត្រាលី និងច្បាប់ប្រទេសខ្មែរយ៉ាងជ្រៅជ្រះនោះអោយវាដឹងផង ព្រោះនាងបានចាត់ទុកការឆ្លេីយរបស់ខ្ញុំទៅកាន់សារព័ត៌មាន Swift News និង Best TV កាលពីថ្ងៃសុក្រទី7.06.2024 ថាមិនទាន់បានទទួលដីកានោះគឺជារឿងបោកប្រាស់ ថាខ្ញុំកុហកមហាជន ដូចនេះទើបខ្ញុំត្រូវបង្ហោះដោយសង្ឃឹមថានាងហង្សបាក់ស្លាបឯងនឹងឈប់មុសារខ្ញុំនៅពេលនាងបានឃើញលិខិតស្នាមមេដៃ និងការពន្យល់ច្បាស់ៗរបស់ខ្ញុំនេះហើយ ។ ខ្ញុំមិនកំសាកគេចវេសទេ ខ្ញុំត្រៀមខ្លួនសហការណ៍ជាមួយតុលាកាដោយរីករាយមិនដែលខ្លាច មិនដូចអ្នកខ្លះដល់ថ្ងៃគេចៗកាលខ្ញុំប្តឹង ។ ចាំជួបគ្នាខែក្រោយនៅតុលាការតាមការអញ្ជើញ» ៕
