ខណៈអ្នកសិល្បៈភាគច្រើនមិនសូវនិយាយរឿងរ៉ាវដែលទាក់ទងជាមួយសង្គមជាតិ តែបើក្រឡេកមកមើលឌីជេ ក្តិប ហាក់មានភាពក្លាហានដែលពេលខ្លះលោកបានបញ្ចេញមតិឬលើកជាចម្ងល់នៅលើបណ្តាញសង្គមយ៉ាងរសើបទៅវិញ ។
យ៉ាងណាមិញនៅក្នុងថ្ងៃនេះគេសង្កេតឃើញមានមហាជនភាគច្រើនមិនថាអ្នកលេងបណ្តាញសង្គមឬអ្នកសិល្បៈនោះទេម្នាក់ៗបានបង្ហាញការមិនពេញចិត្តក្រោយពីបានឃើញតារាងតម្លៃនៅប្រាសាទអង្គរវត្តពីសំណាក់អាជ្ញាធរជាតិអប្សរាដោយម្នាក់ៗបានបញ្ចេញយោបល់ទៅតាមការយល់ឃើញរៀងខ្លួន ។ បើក្រឡេកមើល ឌីជេក្តិប ហាក់មិនចាប់អារម្មណ៍ចំពោះរឿងនេះទេលោកបែរជាលើកជាសំណួរមួយដែលធ្វើឱ្យអ្នកលេងហ្វេសប៊ុក ចូលរួមខមិនវែកញែកជាហូរហែរ ។ ឌីជេមាឌតូចល្អិតរូបនេះបង្ហោះសំណេរខ្លីថា «ឆុយយក្ស!យកអង្គរមកបង្វែររឿង៤ខេត្ត?មែនក៏អី…?»។សំណួររបស់ ឌីជេ ក្តិប ទទួលបានការខមិនគាំទ្រ និងសរសើរពីភាពឆ្លាតវៃរបស់លោក តែក៏មានអ្នកខ្លះដាស់តឿនមិនចង់ឱ្យលោកលើកជាសំណួរបែបនេះឡើយ។
ឌីជេ ក្តិប ត្រូវបានគេស្គាល់ថាជាតារារ៉េបដែលមានប្រជាប្រិយភាពម្នាក់កាលពីជិត ១០ឆ្នាំមុនហើយលោកក៏ជាអ្នកនិពន្ធបទចម្រៀងដែលមានទេពកោសល្យម្នាក់ដែរ ។ ប៉ុន្តែប៉ុន្មានឆ្នាំចុងក្រោយនេះឌីជេ ក្តិប ហាក់មិនសូវមានឈ្មោះបោះសំឡេង នៅក្នុងពិភពសិល្បៈដូចមុន ស្របពេលតារាវ័យក្មេងស្រករក្រោយរីកដុះដាលជាបន្តបន្ទាប់ តែយ៉ាងណាតារារូបនេះនៅតែបន្តអាជីពនេះដដែល ។ ចុងក្រោយនេះ ឌីជេ ក្តិប កាន់តែទទួលបានការពេញចិត្តពីអ្នកលេងហ្វេសប៊ុកក្រោយពីលោកចូលចិត្តចែករំលែករឿងមានប្រយោជន៍មួយចំនួនដែលតារាក្នុងសិល្បៈភាគច្រើនមិនសូវហ៊ាននិយាយ៕
