ខណៈដែលមហាជនជាច្រើនបានពោលពាក្យសរសើរពីសំណាងរបស់តារាសម្តែង ប៉ែន ភ័ក្រ្តសុធារិទ្ធ ដែលមានគូស្នេហ៍ជាអ្នកមានទ្រព្យស្តុកប្រាក់ចាយមិនអស់នោះស្ទើរគ្រប់គ្នានោះស្រាប់តែតារាសម្តែងរូបនេះបោះពាក្យថាលោកមិនដែលប្រាថ្នាអ្វីដែលហូសពីសមត្ថភាពរបស់ខ្លួនឡើយ ។
មិនខុសពីលោក រស់ រាជ្ជសាល ឬលោក ប៊ឺរី ឡើយមហាជនជាច្រើនបានលើកឡើងពីបុណ្យព្រេងរបស់លោក ប៉ែន ភ័ក្ត្រសុធារិទ្ធ ដែលមានដៃគូល្អទាំងព្រមមិនថាឋានៈ មាសប្រាក់ និងជំនួញពេញដៃ ។ ស្ទើរតែអាចនិយាយថាទោះលោកមិនប្រកបអាជីពសិល្បៈក៏លោកមិនខ្វះប្រាក់ចាយនោះដែរ ។ប៉ុន្តែយ៉ាងណាពេលនេះលោកនៅតែបន្តទទួលការងារសិល្បៈជាធម្មតា សូម្បីតែរថយន្តក៏លោកមិនបានលេងដូចមិត្តរួមអាជីពដទៃឡើយ រហូតអ្នកខ្លះបានមើលងាយពីសំបកក្រៅរបស់តារាសម្តែងសម្បុរស្រអែមរូបនេះទៀតផង។ តែត្រូវបានលោកអះអាងថាមិនចង់ហ៊ឺហាដោយការជំពាក់លុយរបស់គេ ។ បន្ថែមពីនេះតារាសម្តែងវ័យ៣៥ឆ្នាំរូបនេះបានបង្ហោះសារច្បាស់ៗថា«តាំងពីរដើមដល់ឥលូវខ្ញុំមិនដែរប្រាថ្នាអ្វីដែរហួសពីរសម្ថភាពដែរខ្លួនឯងមានទេ រស់ដោយសច្ចះទៀងត្រង់ រស់ដោយកំលាំងញើសឈាមខ្លួនឯងតាំងពីរធំដឹងក្តីមកម្ល៉េះ»។
បើតាមការលើកឡើងរបស់គូស្នេហ៍ឧកញ៉ា អ៊ាន សៀវម៉ឺ កន្លងមកបានឱ្យដឹងថាលោកស្រីមិនបានហាមឃាត់លោក ប៉ែន ភ័ក្ត្រសុធារិទ្ធ នៅក្នុងការប្រឡូកសិល្បៈឡើយព្រោះជាចំណូលចិត្តរបស់លោក ។ កន្លងមកលោក ប៉ែន ភ័ក្រ្តសុធារិទ្ធ ក៏ជាតារាប្រុសមួយរូបដែលនិយមថតរឿងដែលមានឈុតឆាកស្នេហារោលរាលមិនធម្មតាដែលមានដូចជាជាមួយតារាស្រី តាន់ សុផា ហៅ ជេស៊ីកា ជាដើម ។
ពេលនេះលោក ប៉ែន ភ័ក្រ្តសុធារិទ្ធ កំពុងមានវត្តមាននៅក្នុងរឿង «ជនបង្កប់»របស់ទូរទស្សន៍ហង្សមាស ។ អ្វីដែលកត់សម្គាល់ទោះមានវ័យខុសគ្នាដល់ទៅ ១០ឆ្នាំ ជាមួយគូស្នេហ៍ក្តី តែគេសង្កេតឃើញលោក ប៉ែន ភ័ក្រ្តសុធារិទ្ធ និងគូស្នេហ៍មើលទៅសមគ្នាដូចវ័យស្របាលៗគ្នា។ ក្នុងនោះក៏មានអ្នកគាំទ្រជាច្រើនចង់ឃើញលោក ប៉ែន ភ័ក្រ្តសុធារិទ្ធ និងឧកញ៉ា អ៊ាន សៀវម៉ី គ្រងឈុតកូនកំលោះក្រមុំនៅក្នុងពេលឆាប់ៗនេះ៕
