គិតមកដល៉ពេលនេះ ចំរើន សុភ័ក្រ្ត សម្រាលកូនបានជិតពីរខែហើយដែលអ្នកនាងត្រូវគេចាត់ទុកពិតជាអ្នកម្តាយសម័យថ្មីព្រោះសម្រាល មិនទាន់បានមួយខែស្រួលបួលផង បានចេញទៅកើបប្រាក់ជាបន្តបន្ទាប់នៅតាមឆាកប្រគំតន្រ្តីនានាធម្មតាដោយមិនខ្វល់រឿងសរសៃនៅខ្ចីនោះទេ ។ អ្វីដែលគួរឱ្យកត់សម្គាល់នៅក្នុងថ្ងៃទី ២៥ នេះ ចំរើន សុភ័ក្រ្ត និងស្វាមី បានបណ្តើរគ្នាទៅប្រទេសអាមេរិកទៀតផង ។
នៅក្នុងថ្ងៃនេះដែរតារាចម្រៀងប្រចាំផលិតកម្មហង្សមាស ចំរើន សុភ័ក្រ្ត បានបង្ហោះរូបភាពមួយចំនួនបង្ហាញដល់អ្នកគាំទ្រពីដំណើរចាកចេញទៅសហរដ្ឋអាមេរិក ។ជាមួយនឹងការតុបតែងខ្លួនយ៉ាងស្រស់ស្អាតស្ទើរមិនដឹងថា ចំរើន សុភ័ក្រ្ត ជាអ្នកម្តាយដែលទើបសម្រាលកូនបានជិតពីរខែនោះឡើយ ។ មិនទាន់មានការបញ្ជាក់ច្បាស់លាស់ថាតើ ចំរើន សុភ័ក្រ្ត ទៅសហរដ្ឋអាមេរិកដើម្បីចូលរួមនៅក្នុងកម្មវិធីប្រគំតន្រ្តីអ្វីហើយមានរយៈពេលប៉ុន្មាននោះឡើយ ។
ប៉ុន្តែក៏មានការបង្ហើបថាតារាចម្រៀង ចំរើន សុភ័ក្រ្ត នឹងចូលរួមនៅក្នុងកម្មវិធីប្រគំតន្រ្តីមួយនៅរដ្ឋសាន់ហ្វ្រាន់ស៊ីស្កូជាមួយតារាចម្រៀង ខេមរៈ សិរីមន្ត និងតារាចម្រៀង បាន មុន្នីលក្ខណ៍ ដែលនឹងធ្វើឡើងនៅក្នុងថ្ងៃទី ២៨ខាងមុខនេះ ។
ជាមួយនឹងការជូនពរពីសំណាក់អ្នកគាំទ្រក៏មានការផ្តល់ជាមតិយោបល់ឱ្យតារាចម្រៀង ចំរើន សុភ័ក្រ្ត មានការថែទាំសុខភាពផងព្រោះអ្នកនាងនៅទើបសម្រាលកូនដំបូងបានមិនទាន់ពីរខែស្រួលបួលនោះទេ ។ មិនមែនជាលើកដំបូងទេដែល ចំរើន សុភ័ក្ត្រ និង ស្វាមីបានធ្វើដំណើរទៅប្រទេសអាមេរិក។ ទោះមិនមែនជាតារាលំដាប់ជួរមុខ តែ ចំរើន សុភ័ក្ត្រ ក៏ត្រូវបានអ្នកគាំទ្រសរសើរពីទឹកដមសំឡេងដ៏ផ្អែមរបស់អ្នកនាង ជាពិសេសស៊ីជាមួយនឹងបទសម័យដើម។ អ្នកគាំទ្រខ្លះក៏បានប្រៀបធៀបសំឡេងនិងទម្រង់មុខរបស់ ចំរើន សុភ័ក្រ្ត ទៅនឹងតារាចម្រៀងជើងចាស់ ហ៊ឹម ស៊ីវន ៕
