អ្នកគាំទ្រជាច្រើនបានបង្ហាញការរំភើបនិងរីករាយជាខ្លាំងក្រោយពីបានឃើញតារាសម្តែងរូបស្រស់ ឈិន មុន្នីនាថ បានជូនកាដូដ៏ស្រស់ស្អាតដែលបញ្ជាក់ពីអត្តសញ្ញាណជាតិខ្មែរដល់កំពូល Yutuber Ishow Speed ដែលបានធ្វើដំណើរមកដល់ប្រទេសកម្ពុជាលើកទីពីរ កាលពីថ្ងៃទី ២៣ ម្សិលមិញនេះ ។ មិនមែនជារឿងចៃដន្យឡើយតាមពិត ឈិន មុន្នីនាថ បានត្រៀមកាដូរួចជាស្រេចសម្រាប់វត្តមានរបស់ Ishow Speed ។
បើតាមការរៀបរាប់របស់គូស្នេហ៍ នាយព្រែក បានឱ្យដឹងថាតាមពិតនាងបានដឹងជាមុនពីវត្ត មានរបស់ Ishow Speed មកកន្លែងក្លឹបហាត់គុនខ្មែរ Cambodia Top Team ដោយសារក្លឹបហាត់គុនខ្មែរនេះជាក្លឹបរបស់ម្តាយមីងនាងដែលត្រូវគេស្គាល់ថាជាអតីតពិធីការិនី ឈិន រីយ៉ា ។ អ្វីដែលកត់សម្គាល់មុនធ្វើដំណើរមកក្លឹបហាត់គុនខ្មែរ Cambodia Top Team Ishow Speed ក៏បានឆាតមកប្រាប់ជាមុនផងដែរ ។
ទាំងនេះហើយជាដើមចមដែលធ្វើឱ្យ ឈិន មុន្នីនាថ មានឱកាសនឹងផ្តល់ជូននូវកាដូក្រមាខ្មែរ រួមនឹងបូដែលធ្វើពីក្រមាខ្មែរយ៉ាងស្រស់ស្អាតជូនដល់កំពូល Yutuber រូបនេះ ។ តារារូបរាងតូចច្រឡឹងរូបនេះបានប្រាប់ថានាងពិតជារីករាយណាស់ព្រោះគ្រាន់តែទទួលកាដូភ្លាម Ishow Speed បានយកក្រមាខ្មែរទៅបង់ក នឹងបានពាក់បូដែលធ្វើពីក្រមាខ្មែរនៅលើក្បាលយ៉ាងរីករាយហើយអ្វីដែលនាងកាន់តែរំភើបនោះគឺឃើញ Ishow Speed ពាក់បូក្រមានេះនៅលើក្បាលជាប់តែម្តង ។
ការបង្ហាញវត្តមាននៅក្នុងក្លឹប Cambodia Top Team Ishow Speed ក៏បានស្លៀកខោគុនខ្មែរថែមទៀតដែលកាន់តែបង្ហាញឱ្យពិភពលោកបានស្គាល់គុនខ្មែរកាន់តែទូលំទូលាយជាងមុនព្រោះដូចដឹងស្រាប់ហើយថា Ishow Speed មាន ហ្វេន ហ្វេន ចម្រុះជាតិសាសន័នៅទូទាំងពិភពលោក ។
ក្រោយការបង្ហាញវត្តមានរបស Ishow Speed ឈិន មុន្នីនាថ រំពឹងថាភ្ញៀវទេសចរណ៍នឹងមកលេងស្រុកខ្មែបានច្រើនជាងមុនព្រោះការផ្សព្វផ្សាយនូវវប្បធម៌និងអរិយធម៌តាមរយៈការ Streamរបស់កំពូល Yutuber រូបនេះ បើទោះមានចំណុចអវិជ្ជមានខ្លះៗសម្រាប់ការមកប្រទេសកម្ជុជាជាលើកទីពីរក្តី ។ គួរឱ្យដឹងថាសម្រាប់ដំណើរមកស្រុកខ្មែរលើកដំបូង Ishow Speed ក៏បានទទួលកាដូដ៏ស្រស់ស្អាតពីនាដការីរបាំ សុខគា គឺមលាង នូវកាបូបដែលធ្វើទង់ជាតិរបស់ប្រទេសខ្មែរផងដែរ ៕
