ពិធីការិនីសម្បូរវោហាស៍ សុភ័ក្រ្ត កុសុម៉ា កាន់តែមានភាពស្រស់ស្អាតនិងលេចធ្លោនៅក្នុងថ្ងៃមង្គលការថ្ងៃនេះដែលប្រព្រឹត្តទៅយ៉ាងអធិកអធមដោយមានការចូលរួមសាទរពីសំណាក់ភ្ញៀវកិត្តិយសទាំងក្នុងនិងក្រៅសិល្បៈជាច្រើន ។ អ្វីដែលគួរឱ្យចាប់អារម្មណ៍ទោះជានៅក្នុងថ្ងៃពិសេស តែ សុភ័ក្រ្ត កុសុម៉ា នៅតែជាកូនក្រមុំកំពូលកូរ និងមានកាយវិការក្រមិចក្រម៉ើមគួរឱ្យស្រឡាញ់ដដែល ។
មិនត្រឹមតែមានភាពអធិកអធមពិធីមង្គលការរបស់ពិធីការិនីសម្តីចាក់ទឹកមិនលិច សុភ័ក្រ្ត កុសុម៉ា នាពេលព្រឹកហែរជំនូននេះត្រូវបានគេមើលឃើញថាប្រៀបបិដូចជាពិធីបង្ហាញម៉ូដសម្លៀកបំពាក់ព្រោះមានការចួលរួមពីសំណាក់សិល្បករ សិល្បការិនី និងអ្នកមានមុខមាត់នៅក្នុងសង្គមជាច្រើន ។ ជាពិសេសជាមួយនឹងឈុតពណ៌ទឹកប្រាក់ដូចៗគ្នាទៅតាមអ្វីដែលកូនកំលោះ និងកូនក្រមុំចង់បាននៅក្នុងព្រឹកនេះ ។
បើក្រឡេកមើលកូនក្រមុំកាន់តែមានសម្រស់លេចធ្លោ នឹងនៅតែមានកាយវិការក្រម៉ិចក្រម៉ើមដែលជាចរិតធម្មជាតិរបស់នាង។ តួយ៉ាងក្រៅពីបំពាក់ចិញ្ជៀនពិធីមង្គលការរបស់ សុភ័ក្រ្ត កុសុម៉ា មានការបំពាក់នូវក្រវិល និងខ្សែកដល់កូនក្រមុំ តែសម្រាប់ កូនក្រមុំឃើញកូនកំលោះបំពាក់យឺតពេកចាប់យកក្រវិលមកពាក់ខ្លួនឯងដែលឃើញហើយពិតជាគួរឱ្យអស់សំណើចតែម្តង ។ អ្នកដែលចូលរួមនៅក្នុងពិធីសុទ្ធតែលាន់មាត់ថាពិតជាកូនក្រមុំកំពូលកូរមែន ។
ដោយសារតែខ្លួនជាអ្នកសិល្បៈ សុភ័ក្រ្ត កុសុម៉ា ក៏បានចូលមកអង្គុយច្រៀងលេងធ្វើព្រងើយជាមួយក្រុមភ្លេងបុរាណយ៉ាងរីករាយនៅក្នុងថ្ងៃមង្គលរបស់ខ្លួនកាលពីថ្ងៃទី ០៣ ម្សិលមិញដែលធ្វើឱ្យអ្នកចូលរួមនៅក្នុងពិធីអស់សំណើចគ្រប់គ្នា ។
ជាមួយនឹងទិដ្ឋភាពមួយនេះកាន់តែធ្វើឱ្យពិធីមង្គលការរបស់ សុភ័ក្រ្ត កុសុម៉ា និងលោក កែវ ផុនផល្លា មានភាពរីករាយថែមទៀត។ សម្រាប់នៅក្នុងពិធីទទួលភ្ញៀវនាល្ងាចនេះគេជឿជាក់ថាពិធីពិសេសរបស់ សុភ័ក្រ្ត កុសុម៉ា កាន់តែរីករាយព្រោះមានការចូលរួមពីសំណាក់អ្នកសិល្បៈជាច្រើនដោយម្នាក់ៗបានត្រៀមខ្លួនយ៉ាងស្រស់ស្អាតជាមួយនឹងឈុតសម្លៀកបំពាក់ពណ៌ rose-gold ដែលជាពណ៌ទៅតាមតម្រូវការ កូនក្រមុំនិងកូនកំលោះតែម្តង៕
