អ្នកលេងបណ្តាញសង្គមជាច្រើនបានបង្ហាញការអាណិតអាសូរក្រោយពីបានឃើញទិដ្ឋភាពដ៏ស្ងាត់ជ្រងំក្នុងពិធីបុណ្យសពរបស់អតីតតារាចម្រៀង យេ យេ ដែលធ្លាប់មានឈ្មោះបោះសំឡេងនៅក្នុងអាជីពសិល្បៈកាលពីអំឡុងឆ្នាំ ១៩៩៨ អ្នកនាង អ៊ុំ គន្ធា ដែលបានរៀបចំធ្វើ នៅក្នុងវត្តពោធិចិនតុង។
គួរឱ្យដឹងដែរថាកាលពីប៉ុន្មានថ្ងៃមុននេះលោក អ៊ឹម ជីវ៉ា ទើបនឹងបង្ហាញរូបភាព អ៊ុំ គន្ធា ដែលធ្លាក់ខ្លួនឈឺធ្ងន់នៅក្នុងបណ្តាញសង្គម តែជាអកុសលកាលពីថ្ងៃទី ១៧ យប់មិញលោកក៏បានប្រកាសថាអតីតតារាចម្រៀងរូបនេះបានលាចាកលោកទៅហើយ ។
ពិធីបុណ្យសពរបស់ អ៊ុំ គន្ធា បានរៀបចំធ្វើទៅតាមព្រះពុទ្ធសាសនាដោយសពតម្កល់ធ្វើបុណ្យនៅវត្តពោធិចិនតុងដែលស្ថិតនៅក្នុង ខណ្ឌពោធិសែនជ័យ រាជធានីភ្នំពេញ។ អ្វីដែលគួរឱ្យអាណិតពិធីបុណ្យសពរបស់អតីតតារាដែលធ្លាប់មានប្រជាប្រិយភាពរូបនេះមានសភាពស្ងាត់ជ្រងំពោលមិនមានវត្តមានអ្នកសិល្បៈរូបណាចូលរួមនោះទេឃើញហើយពិតជារំជួលចិត្តជាខ្លាំង ។ ជាមួយនឹងការចូលរួមរំលែកទុក្ខពីសំណាក់អ្នកសិល្បៈរួមជំនាន់និងអ្នកគាំទ្រក៏មានការឧទ្ទិសឱ្យវិញ្ញាណក្ខន្ធរបស់អតីតតារាចម្រៀងរូបនេះបានស្ងប់សុខនឹងកុំឱ្យអាយុខ្លីដូចជាតិនេះទៀត។ សម្រាប់សពរបស់អតីតតារាចម្រៀង យេ យេ រូបនេះនឹងត្រូវបូជានៅក្នុងថ្ងៃទី ១៨នេះវេលាម៉ោង ៦ល្ងាច ។
បើតាមការលើកឡើងរបស់ លោក អ៊ឹម ជីវ៉ា បានឱ្យដឹងថាមុនពេលទទួលមរណភាព អ៊ុំ គន្ធា ចង់ជួបលោកជាលើកចុងក្រោយដើម្បីអរគុណព្រោះកន្លងមកលោកក៏បានជួយឧបត្ថម្ភជាច្រើនដល់រូបនាងផងដែរ ។
គួរឱ្យដឹងថា អតីតតារាចម្រៀង អ៊ុំ គន្ធាមានវ័យ ៤៥ឆ្នាំ ដែលកន្លងមកនាងក៏ធ្លាប់ជាតារាចម្រៀងយេ យេដែលមានឈ្មោះល្បីម្នាក់កាលពីជិត ២០ឆ្នាំមុន តែគួរឱ្យស្តាយក្រោយពីកើតជំងឺសង្គមជាប់ខ្លួនអតីតតារារូបនេះក៏បានបញ្ចប់អាជីពមួយនេះដោយរស់នៅក្នុងជីវភាពតោកយ៉ាកជាមួយកូនប្រុសបីនាក់។ អ៊ុំ គន្ធា ក៏ជាអតីតភរិយា តារាចម្រៀង ផាន សុផាត ដែលមានកូនចំនួនបីនាក់ជាចំណងដៃក្រោយចែកផ្លូវគ្នា ។បើតាមការលើកឡើងរបស់លោក អ៊ឹម ជីវ៉ា បានឱ្យដឹងថា ឯកឧត្តម ខៀវ កាញារិទ្ធ ក៏បានជួយឱ្យកូនៗរបស់ អ៊ុំ គន្ធា បានរៀនសូត្រនិងឧបត្ថម្ភថវិកាជាប្រចាំខែទៀតផង ៕
