ខេត្តកំពង់ស្ពឺ ៖ នគរបាលស្រុកឱរ៉ា់ល់ និង ស្រុកថ្ពង បានរកឃើញក្មេងស្រី ២នាក់ ប្រគល់ជូនឪពុកម្ដាយវិញហើយ បន្ទាប់ពីដើរលេងអត់ចូលផ្ទះ៥ថ្ងៃ ធ្វើឱ្យម្តាយ និងក្រុមគ្រួសារមានការភិតភ័យជាខ្លាំងដោយខ្លាចមាន ជនខិល ខូចនាំពួកគេទៅធ្វើបាប ។ លោកវរសេនីយ៍ទោ ប៊ុត ប៊ុនធឿង អធិការនគរបាលស្រុកឱរ៉ាល់បានឱ្យដឹងថា ដោយសារតែក្មេងស្រី២នាក់បានធ្វើឱ្យសមត្ថកិច្ចស្រុករ៉ាល់ឈឺក្បាលមិនតិចនោះទេ ព្រោះតែគេទាំង២នាក់បានបាត់ខ្លួនទៅហើយណាត់គ្នាដើរលេងដេកនៅជាមួយសង្សារយ៉ាងរំភើយដោយមិនបានគិតថា ម្តាយមានការបារម្ភចំពោះពួកគេឡើយ ។
យោងតាមពាក្យបណ្ដឹងរបស់ម្តាយ ឈ្មោះ យ៉ែម នូច ភេទស្រី អាយុ៤៣ឆ្នាំ រស់នៅភូមិព្រីងកោង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ បានមកដាក់ពាក្យបណ្តឹងប្ដឹងសមត្ថកិច្ច កាលពីថ្ងៃទី០៧ សីហា បានប្ដឹងចំពោះឈ្មោះ សុត ចន្នី ភេទស្រី អាយុ២១ឆ្នាំ រស់នៅភូមិស្រែវៀន ឃុំសង្កែសាទប ស្រុកឱរ៉ាល់ បាននាំកូនស្រីគាត់ឈ្មោះ យ៉ែម វាសនា អាយុ១៧ឆ្នាំ ចេញពីផ្ទះបាត់មិនឃើញត្រឡប់មកវិញឡើយ ។ ក្រោយទទួលបានបណ្តឹងខាងលើសមត្ថកិច្ចបានធ្វើការស្រាវជ្រាវយ៉ាងសស្រាក់សស្រាំគ្រប់ទីកន្លែងទើបនៅវេលាម៉ោង១០និង៣០នាទី ថ្ងៃទី០៩ សីហា នៅចំណុចភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ សមត្ថកិច្ចរកឃើញ ហើយឃាត់ខ្លួនព្រមទាំងដកហូតមធ្យោបាយធ្វើដំណើរបានម៉ូតូ១គ្រឿង ពណ៌ខ្មៅ ម៉ាកMSX ស៊េរីឆ្នាំ២០១៦ ស្លាកលេខ កំពង់ស្ពឺ 1I-1020 ។
ក្រោយសមត្ថកិច្ចឃាត់ខ្លួន ក្មេងស្រីទាំងពីរខាងលើ បានរៀបរាប់ឱ្យដឹងថា កាលពីវេលាម៉ោង០១រសៀលថ្ងៃទី០៣ សីហា ខ្លួនទាំងពីរនាក់បានណាត់គ្នាចេញពីផ្ទះជិះម៉ូតូទៅដើរលេងជាមួយគ្នានៅផ្ទះសង្សាររបស់ពួកគេនៅស្រុកថ្ពងរៀងៗខ្លួន ។ ពេលជួបគ្នាជាមួយសង្សារពួកគេដំបូងគឺបាននាំគ្នាទៅមុជទឹកក្បាលឆាយអូររនាំង នៅឃុំត្រពាំជោ ស្រុកឱរ៉ាល់ ក្រោយពីមុជទឹកលេងរហូតដល់ល្ងាចពួកគេបាននាំគ្នាទៅសុំផ្ទះគេដេកនៅឱរ៉ាល់(ស្រែកឹន)ដោយដេកនៅទីនោះបាន២យប់ ពួកគេក៏បន្តដំណើរទៅដើរលេងនៅទឹកធ្លាក់ជ្រាវក្នុងស្រុកថ្ពង ជាបន្តទៀតពេលមុជទឹក និងផឹកស៊ីនៅទីនោះយ៉ាងសប្បាយហើយក៏សុំផ្ទះអ្នកភូមិដេកនៅទីនោះបាន២យប់ទៀត ។
ក្រោយមកបាននាំគ្នាធ្វើដំណើរទៅភូមិត្រពាំងក្រើញ ឃុំយាអង្គ ស្រុកថ្ពង ជាផ្ទះសង្សាររបស់ឈ្មោះ សុខ ចន្នី បាន១យប់ទៀតគឺយប់ថ្ងៃទី០៨ សីហា ។
លុះព្រឹកថ្ងៃទី០៩ សីហា ពួកគេទាំងពីនាក់(សុខ ចន្នី និង យ៉ែម វាសនា) បាននាំគ្នាជិះម៉ូតូទៅភូមិអូរអង្គំ ឃុំអមលាំង ស្រុកថ្ពង ដើម្បីរកទិញម្ហូប និងស្រាយកទៅផឹកស៊ីនៅផ្ទះសង្សារគេទៀតក៏ត្រូវសមត្ថកិច្ចស្រុកឱរ៉ាល់ និងស្រុកថ្ពងស្ទាក់ឃាត់ខ្លួនតែម្តង ។
នៅពេលដែលសមត្ថកិច្ចឃាត់ខ្លួនពួកគេភ័យណាស់នឹកស្មានតែខ្លួនមានជាប់ពាក់ព័ន្ឋនឹងបទល្មើសណាមួយតែក្រោយមកទើបដឹងថា ការឃាត់ខ្លួននេះគឺដោយសារតែរឿងពួកគេណាត់គ្នាដើរលេងមិនចូលផ្ទះសោះ ។ នៅព្រឹកថ្ងៃទី១០ សីហា នេះដែរក្រោយបំពេញសំណុំរឿងតាមនីតិវិធីរួចហើយសមត្ថកិច្ចស្រុកឱរ៉ាល់បានប្រគល់មនុស្ស និងម៉ូតូជូនទៅឪពុកម្តាយយកទៅផ្ទះដើម្បីធ្វើការអប់រំ ៕
