លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថាស៊ីម៉ាក់ ប្រឆាំងការជួញដូរ និងហូបសាច់សុនខ (ឆ្កែ) នៅកម្ពុជា។
តាមរយៈហ្វេសប៊ុកផ្លូវការនៅថ្ងៃទី០៤ ខែវិច្ឆិកា ឆ្នាំ២០១៨ នេះ លោក ហេង រតនា បានឱ្យដឹងថាលោកបានជួបពិភាក្សាជាមួយក្រុមជំនាញនៃអង្គការប្រឆាំងការជួញដូរសុនខនៅកម្ពុជា។ អង្គការនេះបានបំពេញការងារនៅកម្ពុជា ដើម្បីជួយផ្សព្វផ្សាយ ការប្រមូលសុនខអនាថា និងជួយព្យាបាលសុនខតាមទីវត្តអារាមជាដើម ព្រមទាំងជួយគិតគូរ ឱ្យអ្នករកស៊ីលក់សាច់សុនខ ប្តូរមុខរបរថ្មី។ ល។
លើសពីនេះទៅទៀត លោក ហេង រតនា បានបង្ហាញពីបញ្ហា៤ធំៗដែលអាចបង្កឡើងដោយការជួញដូរ និងហូបសាច់សុនខកម្ពុជា៖ ទី១- បាត់បង់វប្បធម៌ ទំនៀមទម្លាប់ និងប្រពៃណីដ៍ល្អរបស់ប្រជាជនខែ្មរ ដែលផ្តាំតកូនចៅដោយហាមមិនឱ្យបរិភោគសាច់សុនខឡើយ រហូតដល់យល់ថាជាទង្វើនាំឱ្យចង្រៃដល់ខ្លួនឯង និងគ្រួសារ។ បើគ្មានវិធានការទេ ប្រពៃណី និងវប្បធម៌ដ៏ប្រពៃថ្លៃថ្នូរនេះនឹងរលាយសាបសូន្យមិនខានឡើយ។
ចំណែកឯបញ្ហាទី២- ការបង្កអំពើចោរកម្ម និងបង្កបទល្មើសផេ្សងៗក្នុងសង្គមរួមទាំងទង្វើកាចសាហាវបង្កហិង្សាក្នុងគ្រួសារផងដែរ។
មានផលប៉ះពាល់ដល់សុខភាពសាធារណ: មានប្រភេទជំងឺឆ្លងផងដែរ (នេះបើយោងតាមការវាយតម្លៃមន្ត្រីជំនាញសុខភាពមកពីប្រទេសអូស្ត្រាលី ហើយអង្គភាពស៊ីម៉ាក់នឹងសហការរយៈពេល២ឆ្នាំ គឺ២០១៩-២០២០ ជាមួយសាស្ត្រាចារ្យមកពីសាកលវិទ្យាល័យមែលប៊នដើម្បីតាមដានជំងឺសុនខនៃអង្គភាពស៊ីម៉ាក់) នេះជាបញ្ហាទី៣ និងបញ្ហាទី៤- ភាពអសីលម៌ចំពោះគុណបំណាច់សុនខបម្រើមនុស្សជាតិ ជាពិសេសសុនខហិតមីន សុនខសន្តិសុខ(សម្រាប់សន្តិសុខគ្រួសារ និងសាធារណៈ) សុនខប្រឆាំងភេវរកម្ម សុនខប្រឆាំងគ្រឿងញៀន សុនខការពារព្រំដែនជាដើម។
ក្រៅពីការបារម្ភចំពោះបញ្ហាដែលនឹងកើតឡើងនៃការជួញដូរ និងហូបសាច់សុនខ អគ្គនាយកស៊ីម៉ាក់រូបនេះបានអំពាវនាវដល់ប្រជាពលរដ្ឋកម្ពុជា និងអ្នកអនុវត្តច្បាប់ថាជាពេលវេលាយ៉ាងសមស្របសម្រាប់ចូលរួមលុបបំបាត់ភាពអសកម្មក្នុងសង្គមខែ្មរ និងរួមគ្នាលើកកម្ពស់ប្រពៃណី និងសីលធម៌សង្គមខែ្មរយើង។
